Lebih 400 pesereta ngulu program ‘Townhall JASA Jelajah Akar Umbi 2018’
MIRI: Lebih 400 pesereta ti ari ketuai komuniti, kaban parti komponen Barisan Nasional (BN), staf perintah sereta pekereja sektor peribit di sitak Parlimen Miri udah nyereta program ‘ Townhall Jabatan Hal Ehwal Khas (JASA) Jelajah Akar Umbi 2018’ ti dipejalai ba Komplek Islam Sarawak Miri, lemai kilah ensana.
Tu iya nya komunikasyen betunga mua sereta dialog entara komuniti di kandang endur nya begulai enggau pengelicha khas ari JASA enggau ketuai renggat baruh dikena nerangka isu ti nyadi kemaya hari tu ba menua sereta mega meri awak ngagai komuniti meri penemu sida ti ulih diguna.
Program nya ngaul randau tiga renggat ke udah betuai- ka pengatur randau Panel Pemiki JASA ke mega Direktor Unit Komunikasyen Strategik Tun Faisal Ismail Aziz, Menteri Muda Dagang Temuai, Seni enggau Main Asal ke mega Kaban Kunsil Nengeri ( ADUN) Piasau Datuk Sebastian Ting.
Sama bisi datai iya nya Ketuai Direktor JASA Malaysia Datuk Dr. Mohd Puad Zarkashi, Direk- tor JASA Sarawak Hassan Busu, Pemesai JASA Bagi Menua Miri ke meda Moderator Townhall JASA Jelajah Akar Umbi 2018 Lukanisman Awang Sauni sereta temuai dipebasa ke bukai.
Ku Lukanisman, entara batang tuju ngatur program iya nya dikena naburka penerang strategik ngagai rayat, kelimpah dikena ngenegapka runding talukka menua ngagai komuniti sereta negutka komunikasyen politik ketuai renggat baruh.
“Tu iya nya siti agi produk ari JASA sepengudah program Townhall JASA Jelajah Kampus ti udah digaga kenyau ari berapa taun ke udah.
“Program tu meri peluang ngagai tetiap pesereta ninga sereta nanya bala pengelicha khas lalu berandauka isu kemaya hari ti nyadi ba renggat nasional, bekaul prinsip enggau polisi perintah nengeri, sereta bekaul pemansang ti bisi di Parlimen kelebih agi di Miri,” ku iya.
Ku iya nerang, program nya siri neresa ke- 14 ti dipejalai JASA dalam tanggungpengawa nerang ngagai komuniti di renggat baruh dikena madahka enggau silik agi ungkup penemu rayat bekaul pemansang ti dijapai di menua tu enggau Sarawak.
Pesereta ti bisi datai udah diberi peluang meri tanya bekaul isu ti nyadi kemaya hari ke udah dikerandau bala pengelicha dalam proses ngiga saut sereta jalai mutarka nya.