Projek ILP di Serian disadang tembu 2021
KUCHING: Projek ngaga Institut Latih Industri(ILP) di Serian ke beungkus RM250 juta disadang tembu ba bulan Februari 2021.
Pekara tu dipansutka Menteri Penguasa Pemayuh Pengereja Pengawa Datuk Seri Richard Riot Jaem nengah surat penerang berita kemari.
Iya madah pengawa ngelasi tanah projek nya deka diatur kena 24 Mac tu urung jam 9 pagi di Jalan Tangga By-Pass iya nya betunga enggau Balai Bomba Serian.
“ILP Serian nyadi institusyen pematih ke-33 lalu diserangkum ba Atur Pemansang Malaysia Lumpar Ke- 11( RMK- 11) ti udah dikemendar perintah.
“Projek ILP Serian tu beungkus RM250 juta lalu didirika di kandang endur Bukar Sadong iya nya di Kampung Tenggak di Serian ba tanah pemesai 56.76 ekar,” ku iya.
Riot madah palan latih nya ulih endur matih 600 iku orang lalu nyendia kus ba teknologi welding, teknologi automotif, teknologi penchelap enggau irkon sereta teknologi CADDMekanikal (Minyak enggau Gis).
“Palan tu nyadi ILP keempat di Sarawak ke alai projek tu seraris enggau pemansang SCORE, iya nya enggau tuju nempa mayuh agi orang gawa bepengelandik ngambi ulih nangkup pinta industri dalam menua kelebih agi di Sarawak maya manggai ba taun 2020,’ku iya.
Ketegal perintah udah ngeluarka belanja besai ba projek ILP Serian, Riot meransang bala nembiak( peranak nengeri tu) ngerebut peluang ke disedia ngambi ulih nambah penau sereta pengelandik sebedau sida berengkah gawa.
Ku iya, kus enggau bengkah pengelandik ke disedia engkeman dikena ba ADTEC Bintulu, projek SCORE sereta industri gudang enggau pengawa berumah.
“Pemaik bukai iya nya palan tu diperambu nyendia kus timpuh panjai sereta timpuh pandak ngambi ulih ngangkatka pengelandik orang gawa industri.
“Tu setipak enggau pinta industri ti dekaka orang gawa sida ngembuan pengelandik nengah latih seraya ke kereja,’ku iya.
Kelimpah ari nya, iya mega madah piak industri meseti ngadu kerejasama enggau perintah ba pekara penau enggau infomasyen seraya bekunsi peneleba ba atur ngemansang diri ba industri ti nguna teknologi baru.
Berindik enggau nya, iya ngarap ILP Serian deka nempa mayuh agi nembiak peranak nengeri tu ke ulih besemekih sereta rinduka penau enda ngira renggat umur lalu nyikap sida enggau penau ngambi ulih nangkup dunya globalisasyen.