S’wak napi pemar tu iya nya deka engkechit ari 2.0 ngagai industri 4.0
KUCHING: Takah pemansang entara menua pesisir enggau mengeri siti ari pemar ditapi nengeri tu deka engkechit ari 2.0 ngagai industri 4.0.
Taja pia Menteri Pelajar, Sains enggau Pansik Teknologi, Dato Sri Michael Manyin Jawong madahka dikena nyapai juluk 4.0 nya Kepala Menteri bisi ngungkupka RM1 billion ari belanja perintah nengeri dikena ngemanahka infrastruktur ICT dikena ngaga tiang telekomunikasi enggau ke bukai.
Diatu kitai ba 2.0 tang juluk kitai deka engkechit terus ngagai industri 4.0 ku iya, nya alai kitai begunaka beberapa ejensi nyengkaum baka IBM Corporate Service (CSC) mantu nengeri tu ngulihka digital bedau ekonomi digital, ku iya.
“Ke bendar diatu kitai berundingka bakani chara kitai bejalaika ekonomi digital laban kitai baru aja berengkah sereta enda tau enda engkechit terus ari 2.0 ngagai 4.0, tu pekara ti chukup mar deka dikereja kitai.
“Diatu kitai datai ba digital lalu tu mega siti ari takah ke nyadi. Nya alai kitai nguji deka ngupitka takah entara menua pesisir enggau mengeri sereta ngempitka takah digital. Pekara tu chukup mar.
“Tang aku pechaya enggau bantu ari semua orang lalu semua orang nuju ngagai siti jalai, dia kitai pechaya kitai deka ulih ngereja sereta nyapai nya lebuh manggai taun 2030,” ku iya.
Manyin mansutka pekara nya dalam aum pengarang berita pengudah bejadika pengawa nutup program IBM CSC Malaysia 10: Kuching, Sarawak ti diatur ba Menara Pelita, the Isthmus ditu, kemari.
Nengeri tu enda betapi enggau suntuk pakar laban ulih ngena pakar ari menua luar lebih agi bekaul enggau digital, lalu bekerejasama enggau pakar nya baka ke dipejalaika enggau tim IBM CSC ditu, ku iya.
Dulu ari nya lebuh ke bejaku ba pengerami nya Manyin ngarapka pakar serata dunya ulih bekunsi penemu enggau peneleba dalam teknologi dikena mantu ngamatka juluk Kepala Menteri dalam ekonomi digital.
“Kitai ngelaluka lebih agi pakar dalam bidang digital mantu kitai mutarka pemar ke ditapi nengeri.
“Kepala Menteri kitai
Dato Sri Michael Manyin Jawong Menteri Pelajar, Sains enggau Pansik Teknologi
udah madah kitai nadai pilih bukai kelimpah ari nuju sereta ngemeratka digital enti deka ngemansangka Sarawak 2030.
“Nya alai, kitai amat begunaka pakar. Kebuah iya laban kitai semina deka ngemansangka modal mensia, kitai bisi pengeraja asal tang kitai nadai modal mensia,” ku iya.
Sama bisi datai ba pengerami nya kemari Managing Director IBM Malaysia Chong Chye Neo enggau ke bukai.