Empat ejensi ti nyereta CSC diperansang lengkas ngemeran transformasyen digital
KUCHING: Empat ejensi ti nyereta program IBM Corporate Service Corps (CSC) diperansang lengkas ngemeran sereta ngemeratka penemu timpuh pandak enggau panjai bekaul enggau transformasyen digital.
Menteri Pelajar, Sains enggau Pansik Teknologi, Dato Sri Michael Manyin Jawong madahka laban pejalai transformasyen organisasyen nya deka meri inspirasi ngagai ejensi bukai berengkah ngemeran sereta ngemeratka Strategi Ekonomi Digital Sarawak 2018-2022.
Empat ejensi ke nyereta program nya baka Palan Pemansang Pengelandik Sarawak ( PPKS), Pustaka Negeri Sarawak, Palan Biodiversiti Sarawak (SBC) enggau Dewan Bandaraya Kuching Utara (DBKU).
“Ngena strategi enggau pelan atur pengawa ke dipadah tauka dikemansangka tim IBM CSC, aku arap bendar empat ejensi tu deka lengkas berengkah ngemeranka iya lebih agi dalam organisasyen nya empu, awakka ulih nguna peluang ti disediaka digital sereta mantu enggau meri impak besai agi ngagai orang ke bulih penguntung ari ejensi tu.
“Pejalai transformasyen digital oranganisasyen kita deka nyadi inspirasi ngagai ejensi bukai ngambika berengkah ke diri empu nuju Strategi Ekonomi Digital Sarawak.
“Aku meransang empat ejensi tu ngambika bekunsi enggau ejensi tauka organisasyen bukai pasal konsep, pengelandik praktikal enggau pengelandik profesyenal ke diberi tim IBM,” ku iya.
Manyin mansutka penemu iya lebuh ke bejadika pengawa nutup program IBM CSC Malaysia 10: Kuching, Sarawak ke diatur ba Menara Pelita, the Isthmus ditu, kemari.
“Bekunsi ke pekara nya deka ulih mantu pengulih organisasyen bukai sereta kitai ulih sama besaup ngulihka juluk Kepala Menteri kitai ungkup Sarawak,” ku iya.
Sarawak udah bejadika Strategi Ekonomi Digital 2018-2022, ti bisi nyendiaka 47 perambu strategik dikena mai ekonomi nengeri tejapaika status bepenatai pemisi tinggi lebuh manggai 2030.
Ungkup PPKS, tim CSC ngemansangka roadmap enggau numbuhka palan kapasiti ngambika ulih bejalaika data-driven strategy dikena meransang raban biak di menua pesisir Sarawak berundingka Technical Vocational Education and Training (TVET).
“Tu (TVET) projek ke pemadu beguna ngagai Sarawak. Strategi ke dipejalaika kita ba Palan Pemansang pengelandik deka meri pemanah ngagai kitai nyengkaum ngagai opis menteri, dikena ngiga chara bakani nembiak di menua pesisir ngulihka pengelandik ti diguna ke ulih meri peluang ngagai sida nyereta ekonomi digital Sarawak enggau dikena kami nambahka pemayuh graduate dalam bidang tu,” ku iya.
Ngena roadmap ti dikemansangka tim IBM, Pustaka Negeri ulih gawa ngena data analytics ngambika lebih nemu sereta meretika bakani chara ulih engage enggau raban bansa ke bisi pengerindu macha sereta ngena servis Pustaka Negeri.
Tim IBM udah ngaga Pelan Tindakan ungkup DBKU dikena ngemansangka platform digital ti mungkur raban bansa ngambika lebih beserakup sereta sama ngambi bagi dalam pengawa ngemuntanka penyalah jenayah.
“Aku amat deka nemu sereta meda bakani tim IBM ulih mantu SBC ngemanahka penemu tauka pengelandik asal diurus sereta bakani sida ulih ngena analytic dikena ngenyampatka chara ngena ubat enggau guna utai tumbuh,” ku iya.
Sama bisi datai Menijar Direktor IBM Malaysian Chong Chye Neo enggau ke bukai.