Pekara nya dikemujur nengah Mou ke disain presiden kededua parti

KUCHING: Barisan Nasional (BN) Nengeri nerima chalun ari Parti Rakyat Bersatu (UPP) tang sida bediri ukai nengah tikit UPP tauka chalun terus, ku Kepala Menteri ke mega Chairman BN Nengeri Datuk Patinggi Abang Johari Tun Openg.

Iya ke mega Presiden Parti Pesaka Bumiputera Bersatu (PBB) madah, ba Pengawa Bepilih Besai Ke-14 ( PRU14), konsep chalun terus enda dikena.

“Udah tentu UPP bisi chalun tang ukai nengah tikit UPP tauka chalun terus.

“Meseti nengah tikit parti dalam gempung BN, ba kes tu nengah tikit Parti Sa’ati Rakyat Sarawak (SUPP),’ku iya.

Abang Johari mansutka jaku nya nyaut tanya pengarang berita pengudah ngema- ta pengawa nyain Sempekat Pemereti Ati (MoU) entara UPP enggau SUPP di Indu opis PBB di Jalai Bako ditu, kemari.

Ba sentang chalun ari kededua parti, iya madah pekara nya deka diserenih bala ketuai UPP enggau SUPP.

“Awakka sida nyain sempekat dulu, sentang chalun dudi kitai berunding.

“Sentang chalun ukai pekara ke berat, sida meseti dulu berakup, bekerejasama ba semua pengawa ngambika kitai ulih ngemansangka nengeri,’ku iya.

Ngenang pasal PRU14, Abang Johari bebula ripot siiti suratkabar menua ti madah Menteri Besai deka mantai rintai nama chalun BN kena 2 April tu.

“Aku baru pulai ari Kuala Lumpur tengahari tu tadi ke alai aku bisi betemu enggau Menteri Besai (Datuk Seri Najib Razak).

“Aku nanya pengamat berita nya, iya (Menteri Besai) madah ‘No’,’ku iya.

MoU kemari disain presiden ari kededua parti iya nya Datuk Dr. Sim Kui Huan ( SUPP) enggau Dato Sri Wong Soon Koh (UPP).

Nengah MoU nya UPP enggau SUPP ngiga jalai berakup nengah siti entiti ngambi ulih ngintu pemaik komuniti China enggau komuniti bukai nengah semengat BN.

Abang Johari pechaya nengah kerejasama nya Sarawak ulih dikemansang lalu ngemujur pengeran ngulih kuasa ke patut nengah Sempekat Malaysia 1963(MA63).

Iya muji kededua UPP enggau SUPP ketegal ti udah ngendurka bida antara sida lalu beratka penyerakup ke pemaik peranak Sarawak.

“Enti kitai tegap, udah tentu pinta enggau peneka kitai deka dipending,’ku iya.

Nengah MoU nya, siti Komiti Konsultatif deka ditumbuh lalu deka diarika presiden enggau sekretari besai kededua parti.

Bela datai Sapit Kepala Menteri Datuk Amar Douglas Uggah enggau Datuk Amar Awang Tengah Ali Hassan, Sekretari Besai BN Nengeri Datuk Alexander Nanta enggau ketuai bukai.

Awakka sida nyain sempekat dulu, sentang chalun dudi kitai berunding. Datuk Patinggi Abang Johari Tun Openg Kepala Menteri Sarawak