Langkar baru palan endur ngengkah pengajar opsyen Bahasa Inggeris, Sains enggau Matematik

KUCHING: Opis Menteri Pelajar Malaysia (KPM) patut ngelangkar baru palan endur ngengkah pengajar di Sarawak kelebih agi ti pengajar opsyen Bahasa Inggeris (BI), Sains enggau Matematik.

Presiden Gerempung Pengajar Bumiputera Sarawak (KGBS) Ahmad Malie madahka nya dikena napi peminta guna ba nengeri tu baka ti dipinta Menteri Pelajar, Sains enggau Pansik teknologi Dato Sri Michael Manyin Jawong.

“KGBS nyukung penuh penerang menteri (Manyin) bekaul enggau isu suntuk pengajar telatih ungkup tiga subjek iya nya BI, sains enggau Matematik di nengeri tu nyentuk ke ngeruga pemutus peresa perintah ba Sarawak.

“Ba renggat KPM, KGBS suah ngenataika isu sun- tuk pengajar subjek nya ba Sarawak maya baum enggau opis menteri.

“Tang ironi iya saut ke diberi semua kuota pengajar udah penuh nitihka opsyen. KPM madah isu ke ayan iya nya isu endur ngengkah pengajar ke ngajar subjek nya. Nya alai KPM patut ngelangkar baru palan endur ngengkah pengajar kelebih agi opsyen BI, Sains enggau Matematik,” ku iya madah nengah aplikasyen WhatsApp ngagai Utusan Borneo ditu, kemari.

Bejaku baru, iya madahka nengah pengawa ngelangkar baru endur ngengkah pengajar ungkup subjek opsyen nya, dipelabaka isu nya di Sarawak ulih diputarka enggau chara profesional.

Berebak enggau tu Ahmad madahka KGBS nyambut manah sereta nyukung penuh inisiatif Opis Menteri Pelajar, Sains enggau Pansik Teknologi ti sanggup ngambi baru pengajar ke udah badu ngajar ti efisyen tinggi dalam tiga subjek nya .

Ku iya, pengajar ke udah badu ngajar tauka pakar ngajar tiga subjek nya deka dibayar gaji hari tauka bulan, awakka ngelatih pengajar ti ngajar tiga subjek nya.

Inisitif ke dipejalaika perintah nengeri tu ngayanka pengibuh sereta komitmen tinggi ngagai pengelandik enggau pemandai anak Sarawak dalam tiga subjek nya, ku Ahmad.

“Nya alai pengajar ke udah badu ngajar ke bisi kriteria nya, KGBS minta sida enggau lengkas madahka diri ngagai menteri kitai,” ku iya.