CERT diperambu deka ditumbuh ba 82 sitak DUN di Sarawak
KUCHING: Semua 82 Kunsil Nengeri ( DUN) Sarawak diperambu deka ditumbuhka Community Emergency Response Team (CERT).
Direktor Unit Keselamatan dan Penguatkuasaan Negeri (UKPN), Datuk Dr. Chai Khin Chung madahka, kenyau ari program CERT ditumbuhka ba taun 2010 nyentuk 2017, bisi 33 tim enggau penyampau pesereta CERT bisi 4,450 iku serata Sarawak.
Nitih ku iya, berengkah ari taun 2015 PETRONAS udah nyadi pemelanja tunggal program CERT Sarawak nengah inisiatif Tanggungpengawa Rama Korporat ( CSR) ti ngungkupka belanja sepenyampau RM5 juta ungkup timpuh lima taun nyentuk ke taun 2019.
“Kitai nagit semua sitak DUN Sarawak sama enggau ngambi bagi dalam program CERT tu.
“Taun tu, kitai udah merambu deka ngatur lapan program CERT sereta bisi lima program dilatih baru ti dipelabaka diatur berengkah bulan April tu.
“Kandang endur ke udah ditentuka alai ngatur program CERT baka di De- bak, Kabong, Pakan, Kapit, Simunjan, Matu, Tatau, Beluru manakala program dilatih baru deka diatur di Sebuyau, Belawai, Kpg Saeh Niah, Siniawan enggau Engkilili,” ku iya.
Iya mansutka pekara nya dalam jaku pengelalu pengerami nyerahka ‘portable fire pump’ ngagai 15 tim CERT, ti diatur ba Indu Opis, JBPN Sarawak ditu, kemari.
Pengerami nya udah mujur dipenyadika Sapit Kepala Menteri ti mega Chairman Mutarka Penusah Ngenyit Sarawak, Datuk Amar Douglas Uggah Embas, ke alai iya mega diberi basa nyerahka injin pam nya ngagai 15 Tim CERT.
15 Tim CERT ti nerima pam iya nya ari Batu Kawa, Simpok, Senah Rayang, Bunan Gega, Buntal, Sebuyau, Tanjung Engkabang, Engkilili, Debak, Sungai Jih, Kemunting, Jepak, Belaga, Nanga Medamit enggau Long Sukang.
Ngenang silik pasal pengawa nyerahka pam nya, Chai madahka nya sebengkah elemen dalam program Dilatih Baru CERT lalu semua kandang endur ke udah ditum- buhka tim CERT deka diberi injin sereta deka dibantu Tim Bomba Volunteer (PBS) maya ngena kereban nya, nyema bisi penusah ngenyit nyadi sebedau raban profesional datai.
Pam nya iya nya, injin ke diberi chap Tohatsu model V20ES, produk diimport terus ari menua Jepun ke berega RM30,000 seunit.
“Enggau spefikasyen ti chukup sereta bisi kualiti, aku arap bendar keraban tu ulih mantu komuniti ngambika mudah agi ngena kereban tu,” ku iya.
Kelimpah ari nya Chai madah, dalam timpuh taun baru tu dipelabaka deka diatur ‘JAMBORI CERT’ ti deka ngempuruka semua tim CERT ari serata nengeri Sarawak. Latih intensif pengelama lima hari dikena meri gelar ngagai tim ke udah mujur nitihka program.
Bisi datai Menteri Kaunsil Kandang Menua enggau Pengawa Berumah Datuk Dr Sim Kui Hian, Direktor JBPM Sarawak Nor Hisham Mohammad enggau Ketuai Pemesai Eksekutif Malaysia LNG Sdn Bhd, Pau Kiew Huai kelimpah ari bala ketuai raban bansa.