Raban pengemeran teksi patut bulih penerang ke nyemetak bekaul enggau pekara tu ngambika enda saru penemu
KUCHING: sistem e-hailing enggau Program Transformasyen Industri Teksi (TITP) endang chara perintah dikena mantu pengemeran industri teksi konvensional di menua tu.
Menteri ba Opis Menteri Besai Datuk Seri Nancy Shukri taja pia madah, agi mayuh pengemeran industri teksi konvensional enda meretika pekara tu nyentuk saru penemu ngagai perintah.
“Ambika chunto bisi sekeda deriba teksi konvensional bejalaika Grab tang agi nanya nama utai dikumbai e-hailing.
“Reti nya sida enda meretika nama pengawa ke benung dipejalaika perintah dikena mantu sida.
“Kitai seruran nerang ngagai sida. Kitai mega nemu tu tikas pemar ngagai deriba teksi lalu sida patut bulih penerang ke nyemetak bekaul enggau pekara tu,” ku iya.
Iya madah munyi nya rambau dirandau pemberita pengudah bejadika pengawa nutup Bengkel TITP Sarawak enggau Bejadika Bup Log Deriba Bas BIMP- EAGA renggat nengeri ba sebengkah hotel ditu, kemari.
Nangkan nya, Nancy madah inisiatif nengah TITP baka ke udah dibantai Menteri Besai Datuk Seri Najib Tun Razak nyendiaka mayuh bansa bantu ungkup deriba teksi konvensional.
“Sida betanyaka geran baka deka nukar teksi baru tang kebendar pekara nya udah dikemendar sebedau tu nengah agih belanja RM5,000 ungkup sida.
“Nya alai, kitai ngatur bengkel tu dikena meri awak ngagai sida ngenataika penemu enggau sebana sida lalu berebak enggau nya nerang nama pengawa digaga perintah ungkup sida,” ku iya.
Nya alai, Nancy ngasuh bala deriba teksi ba nengeri tu datai ngagai Opis Kaunsil Pekara Lesen Entukar Dagang ( LPKL) Sarawak ngambi bulih penerang ke pemadu baru bekaul engau pekara nya.
Sama bisi dati Kaban Parlimen Limbang ke mega nyadi Chairman Kaunsil Pekara Lesen Dagang ( LPKP) Sarawak Hasbi Habibollah enggau temuai ke bukai.
Ambika chunto bisi sekeda deriba teksi konvensional bejalaika Grab tang agi nanya nama utai dikumbai e-hailing. Datuk Seri Nancy Shukri Menteri ba Opis Menteri Besai