Pemujur DTTG nyaup Rh Ekau, Sungai Serunggut ngenataika pinta karan dipuji
MIRI: Taja tisi jalai lalu muntang dilawa ari jalai besai, Jalai Miri-Bintulu, mengkang dalam petang taja tiang api udah didiri besemak enggau rumah panjai sida endang tau ngasuh nyima.
Pengudah sida minta ngagai raban bekaul, peranak Rumah Ekau udah nya ngalih ngagai Raban Pemikir Dayak tauka Dayak Think Tank Group (DTTG) minta saup mantaika sebana sida ti agi diau petang taja tiang api bisi ba mua rumah panjai sida, seraya di rumah panjai lampu enggau sambung tali karan udah disambung.
“Semina tinggal tali karan nyambung ngagai tiang api ngagai rumah panjai kami aja bedau, kami meruan diau dalam petang ngelama tu,” ku Tuai Rumah (TR) Edward Ekau ari Sungai Serunggut, Suai, Niah.
Urung 75 km penyauh ari mengeri Miri, peranak rumah panjai udah nya nerima timbal ari Menteri Bekal Ai enggau Elekterik Menua Pesisir, Dato Sri Dr Stephen Rundi Utom, ti ngerah raban bekaul nembuka pengawa nyambung bekal kuasa karan ngagai Rumah Ekau.
Pengudah diau dalam petang nyauka lima taun pengelama, peranak Rumah Ekau diatu berasai lantang laban rumah panjai sida udah tampak enggau bekal kuasa karan 24 jam.
“Ba pekara tu, kami chukup beterima kasih ngagai raban DTTG ti udah ngenataika penanggul kami ngagai raban bekaul lalu terima kasih mega ngagai Dato Sri Dr Stephen Rundi ti udah nyaup mutarka penanggul kami dataika sambung kuasa karan tembu digaga,” ku iya nerang rambau pengawa bejadi sambung kuasa karan di rumah panjai nya, apin lama ke udah.
Pengawa nya udah dipenyadi pemungkal DTTG ke lalu nyadi Chairman, Wellie Henry Majang, dikena masa pemanah pengawa raban nya ti udah mantu bansa Dayak begunaka bantu di nengeri tu.
Rumah panjai ti diuan urung 80 iku peranak, tinggal dalam pemansang enggau nadai ngembuan penyikap perengka guna pemun baka bekal ai beresi, bekal kuasa karan sereta sambung jalai ti meruan.
Diatu enggau bekal kuasa karan udah disambung sebedau Hari Krismas taun nyin tadi, tu mantu peranak ngereja pengawa sida besehari sehari.
“DTTG mega deka ngena awak tu meri terima kasih ngagai Dato Sri Dr Stephen Rundi ti sikar mutarka penanggul tu pengudah ninga sebana nya.
“Kami mega meri terima kasih ngagai sida ti udah meri bantu enggau kerejasama nentuka rumah panjai tu bisi baka ke sehari tu,” ku Wellie.
Ku Wellie, endang udah nyadi pemerat perintah ngemansangka infrastruktur menua pesisir sereta pengelantang komuniti patut diperati perintah ke bisi diatu, laban sida dipilih rayat ti diayan nengah undi maya pengawa bepilih, sekalika di renggay perintah nengeri tauka nasional.
“Taja baka ke udah laun tang iya meseti ngemai mayuh agi pemansang ngagai per- anak menua pesisir laban sida udah meri mandat besai ngagai perintah ke diatu,” ku iya nambah.
Raban DTTG ke bisi bejalai ngabas Rumah Ekau, diuluka Wellie, disempulang Chairman DTTG Miri Elias Lipi, mandal chairman Philip Asry sereta bala kaban komiti DTTG Miri ke bukai.