Chalun BN deka dibantai, raban pengawa bepilih parti patut nyikap diri

MUKAH: Semua raban pengawa bepilih parti dilalau nyendiaka diri napi Pengawa Bepilih Besai ke14 (PRU 14).

Kaban Kunsil Nengeri (ADUN) Jemoreng Datuk Dr Juanda Jaya madah, tu berindik ari Chairman Barisan Nasional (BN) Datuk Seri Najib Tun Razak ke bisi nyebut deka mantaika nama chalun ti dipelabaka deka digaga kena 2 April tu ila.

“Pengabis kurang dua minggu tu ila, semua nama chalun BN deka dibantai, nya alai semua injin parti ( komponen BN) patut udah nyendiaka diri napi PRU14,” ku iya madah lebuh dikerandau ulih Utusan Borneo kemari.

Bedau lama tu ke udah, ‘bilik gerakan’ Parti Pesaka Bumiputera Bersatu (PBB) renggat DUN Jemoreng udah berengkah dibuka.

Ku Juanda, semua piak kelebih agi ba pun menua, enti nitih udah masuk ‘Gear Lima”.

Ba pekara ke sama nya mega, Juanda ngelalau semua danji ngagai rayat ke disemaya dalam pengawa bepilih ke udah patut digaga enggau jampat.

“Anang enda ingat ke semaya diri maya pengawa bepilih ke udah, digaga enggau jampat, sebedau PRU14 tu,” ku iya.

Iya nandu baru madahka, tetiap pekara sereta penanggul rayat mega meseti dikemerat sereta digaga.

Lalu baka nya mega enggau semua polisi Perintah mega patut diterangka ngagai rayat,

“Padah sereta beri penerang ngagai rayat ngambika sida iya mereti pasal polisi perintah baka kediatu, laban nyangka bisi sekeda ke bedau nemu tauka enda mereti,” ku iya.

Najib ti mega nyadi Menteri Besai, sebedau tu, kala madahka deka ngerintaika nama chalun tumu agi ari baka ke udah.