Beserakup, besaup enggau kerejasama nyadi lalau PPK
KUCHING: Beserakup, besaup enggau kerejasama ditetap nyadika lalau bala kaban komiti, komiti mendam, komiti tetinggi, sereta bala kaban bukai dalam Serakup Dayak Sarawak (PEDAS) Pampang Kuching (PPK) ungkup penggal 2018/2019.
Pekara tu udah dipansutka rambau Aum Besai Ninting Taun (AGM) PPK ti diatur di sebengkah hotel tebilang ditu, 18 March tu tadi. Aum diketuaika Ketuai Pampang, Victor Ason, ke lalu nyadi Mandal Presiden II PEDAS, lalu udah digulu lebih 30 iku kaban ke bukai.
“Ngarapka kitai ti beserakup dalam PEDAS deka mansang agi ba semua sukut pengawa kelebih agi bekaul enggau bansa Dayak di nengeri tu, baka ba pelajar bala anak, pangku pengawa diri sereta mega ba ruang bilik.
“Pekara pemadu beguna diatu iya nya anang nejuka pangan diri maya ngatur sekeda pengawa ti diatur serakup kitai. Beri kerejasama. Pengawa berat deka nyadi lempung enti kitai besaup ngereja,” ku Victor dalam jaku pengelalu pengudah di- padu baru mangku pengawa nyadi ketuai pampang.
John Isot dipadu nyadi Sapit Ketuai Pampang, Connie Stephen (Sekretari) disaup Pauline Sumbang ke dipadu nyadi Penulung Sekretari, Patricia Tarang ( Tukang Wang) lalu sapit iya, Fedrick Tembak, Lina Kunjak (Ketuai Indu) seraya Novert Sullang dipadu nyadi Penyanding Penemu Pekara Wang PPK.
Antara komiti bukai dipadu mangku pengawa Charles (Ketuai Komiti Ngintu Pengelantang & Pekara Rama), Petrius Lagan (Ket- uai Komiti Rekreasyen), Ambrose Ramping (Ketuai Komiti Main Asal & Adat Istiadat), Augustine Anding (Ketuai Komiti Pekara Pelajar & Pengerai), Ronald Janang (Ketuai Komiti Pekara Pengelikun) enggau Polycarp Danson (Ketuai Komuniti Pemadah, Publisiti & Komunikasyen).
Raban komiti mendam ti udah dipadu nyerumba AGM sekali tu iya nya Anthony Ejau, Ranu Pali, Jeffry Douglas, Riggie Nanang enggau Shirly Munjah.
Berebak enggau aum nya mega, sekeda ari aktiviti ke bisi diperambu ungkup penggal 2018/2019 baka program meri darah, aktiviti hari diri sebilik, ngulu pengerami malam mantar Gawai PEDAS Sibu sereta pengawa meri bantu penusah ngenyit baka penusah angus, ampuh bah, pemati enggau ke bukai endang seruran nyadi pekara dikemerat raban PEDAS ukai semina di Kuching aja, tang mega di selampur nengeri belalauka genteran jaku peransang PEDAS iya nya ‘Setempap Enda Rarat, Seinchi Enda Rari’.