BR1M baka perais besai ba rayat ti kurang pemisi
ENGKILILI: “Terima kasih ngagai Tuhan laban bisi diberi Bantu Rakyat 1Malaysia (BR1M) tu lalu tu mih perais ke chukup besai ari perintah Barisan Nasional (BN) ngagai rayat ti ngelama tu chukup siru mendingka sebana kami”.
“Engka ba orang pemisi, penyampau ke diterima chukup mit tang ba kami ke nadai tentu penatai pemisi, orang tuai, enggau sida ke enda dapat ngasaika pemeri tu baka rezeki ke labuh ari langit,” ku Mahni Piee, 45 taun.
Iya ke mega nerima baucher BR1M ngarika menyadi iya, Rosnani Piee madah pemeri bantu nya berenggat ulih nyeliahka iya dikena sengapa.
Penemu ke sebaka bela dikunsika siku agi penerima Sandai Sampar, 30an, ke enda badu-badu meri terima kasih ngagai perintah BN laban ke endang seruran beratika pengidup rayat ti kurang pemisi baka iya.
“Taja pan nya ukai penyampau ke mayuh tang laban pemeri diberi tiga renggat ungkup sepintu bilik sereta diberi sekali aja ungkup orang bujang nya ngelai perintah BN chukup nemu ngasaika penusah rayat ke napi pangka ekonomi ke tinggi jam diatu,” ku iya.
“Patut nemu, pengawa meri BR1M ukai pemanis ungkup pengawa bepilih besai Negeri tauka Parlimen sereta dikena nginti undi tang iya digaga laban polisi perintah ke deka bekunsika penatai pemisi menua tu enggau chara ke betul,” ku iya.
Dulu ari nya lebih 2,000 penerima nedat Opis Pelilih Mit Engkilili, laban nganti gintir ngambi baucher BR1M ke dipenyadika Kaban Kunsil Nengeri (ADUN) Engkilili Dr Johnical Rayong Ngipa.
Siku agi penerima, Liew Teck He, 40an, madah arapka BR1M majak ditampung agai taun ke deka datai laban nya chukup besai reto ngagai peranak menua pesisir.
“Enti ulih penyampau ke diberi ngagai sida ke bujang enggau udah beruang bilik nya ditambahka agi setipak enggau penatai pemisi menua,” ku iya.
Berebak enggau nya, Dr Rayong madah bantu BR1M mandangka perintah BN chukup ngemeratka pengelantang pendiau semua rayat.
“Bantu ari perintah ukai ditatak ngagai pengawa nyendiaka perengka guna infrastruktur tang nyengkaum bantu belanja baka BR1M,” ku iya.
“Pengawa meri bantu nya mega ukai semina nyelinting siti bansa aja, penemu politi tauka penuduk dalam komuniti tang diberi ungkup sida ke udah ditapis ejensi perintah ke bekaul”.
“Tu mega ningkah tuduh sekeda piak ngumbai meri BR1M dikena ‘ngikat’ rayat lebih agi pengundi ngambi terus ngundi perintah...tang nya diberi kelai perintah chukup nemu penusah ditapi rayat jam ke diatu,” ku iya.
Berindik ari nya, Dr Rayong deka rayat terus meri mandat ngagai perintah lebih agi rambau Pengawa Bepilih Besai ke- 14 ( PRU- 14) ke deka diatur sebarang maya bepun ari diatu.
“Beri mih mandant ngagai sapa aja chalun BN ba PRU14 tu ngambika mandat ti kering ngemuntang Kepala Menteri Datuk Amar Abang Johari Tun Abang Openg nagih hak Sarawak ke udah lama tekesai ketegal ketuai ke dulu suba,” ku iya.
Tambah mega, agi mayuh perambu Abang Johari ke bedau tejapai nyengkaum legasyen ke udah ditinggalka niang Tok Nan, lalu mandat ke tegap deka ngemuntang iya bejaku ngarika Sarawak.
Iya mega ngelalau bala penerima bantu ngambi nguna duit ke diterima enggau manah lalu nyimpan mimit ke penabat dudi hari.
Sama bisi datai maya nyuaka BR1M nya Pemesai Opis Kunsil Pelilih Lubok Antu Richard Ngumbang, Pemesai Pengatur Pengawa Sarawak ba Opis Kunsil Pelilih Mit Engkilili Brin Munsang enggau bala bukai.