Isaiah begunaka sukung, tulung ari mensia mayuh
KUCHING: Siku nembiak ke beumur 16 taun, Isaiah Santih, enti nitih patut baka nembiak bukai agi ransing besekula tang tudah semina duduk ba kerusi ruda belama iya.
Isaiah semina ngarapka orang mantu iya belama laban nadai daya bukai, pengudah iya dituntung penusah bebadi jalai alun lalu ngujungka pala iya bakal.
Penusah bebadi nya nyadi kena bulan Oktober 2017 maya iya ba rantau jalai ari sekula deka pulai ke rumah.
Naka kediatu, nembiak nya semilan kali udah beputung laban ke deka gerai.
“‘Isaiah begunaka kerusi ruda, ngena pampers sais ‘L’ sereta ngirup tusu ngena tiub,” ku Pemungkal Hope Place Kuching, Kelvin Wan madah nengah siti penerang, ensana.
Ku Wan, indai Isaiah, Cecelia nadai pilih bukai tang badu gawa, laban ngibun Isaiah.
“Cecelia mega bisi madah ngagai kami, iya ngibun sereta meri Isaiah nusu ngena tiub ninting tiga jam,” ku iya. Wan madahka sida Cecelia sebilik kurang pemisi ngibun Isaiah dalam timpuh ke panjai, laban seruran bebelika tusu enggau pampers kena Isaiah.
“Dalam ruang bilik nya, semina apai Isaiah aja ke gawa, ke begaji dalam RM950 sebulan, lalu enti udah mayar suwa rumah RM380, sida sebilik semina bisi tinggal mimit belanja laluh gaji, lalu sekeda nya dikena meli tusu ‘Ensure’ ke berega entara RM77-85 setin,” ku iya.
Mensia mayuh ke deka nemu enggau silik agi penusah ke ditapi ulih sida Isaiah sebilik, tau nalipaun Hotline Hope Place Kuching, ba lumur 013-567 2775 tauka 082- 505 987, ari pukul 8.30 pagi ngagai 12 tengahari sereta ari pukul 2 ngalih hari ngagai 5 lemai (Hari Satu ngagai Hari Lima) lalu hari Enam (ari pukul 9 pagi ngagai 12 tengahari).
Enti mensia mayuh bisi ati deka meri tulung sida iya, sida iya tau minta resit ari pengereja pengawa Hope Place, lalu sida ke deka ngemasukka duit, tau digaga nengah nama ‘Persatuan Kebajikan Harapan Kuching -Maybank account: 5112-8900-1160’.