Perintah seruran ngaga perambu pemansang ke Sarawak, tang perambu nya enda tau enda digaga enggau silik
KUCHING: Kepala Menteri Datuk Patinggi Abang Johari Tun Openg deka madahka jalai ke deka ditengah ulih ‘Sistem Transit Aliran Ringan ( LRT)’ Sarawak kena 29 Mac tu.
Ku iya, pekara tu nyadi perambu ke besai ke pemansang di menua tu.
“Aku enda bula pasal pekara tu (ngaga LRT) lalu ukai jaku politik aja.
“Kena 29 Mac tu ila, aku deka mantaika jalai ke deka ditengah LRT ke deka dikemansangka di Sarawak,” ku iya madah lebuh bejaku ba Program Harmony Nite di Kota Sentosa Square ditu, kemari.
Sama bisi enggau ngulu atur pengawa nya, Menteri Komunikasi enggau Multimedia Datuk Seri Salleh Said Keruak, Menteri Kereja, Datuk Seri Fadillah enggau Menteri Opis Kandang Menua enggau Pengawa Berumah, Datuk Profesor Dr
Perintah ngaga pemansang ke pemerat rayat Sarawak lalu ukai semina bejaku sengapa aja. Datuk Patinggi Abang Johari Tun Openg Kepala Menteri Sarawak
Sim Kui Hian.
Ku iya, ke nyadi pemerat, Perintah seruran ngaga perambu pemansang ke Sarawak, tang enda tau enda digaga enggau silik agi.
“Kitai patut nemu mansik enggau silik agi, ni bagi keretapi ke ulih dikena, injin, kapasiti sereta perengka guna bukai, ke semua tu begunaka perambu ke silik.
“Tang bisi piak ke madahka (perambu ngaga LRT) semina ‘hot air’ aja, ila udah tembu (LRT), iya mega ke enggau ngena nya ila,” ku iya.
Abang Johari madah, Perintah ngaga pemansang ke pemerat rayat Sarawak lalu ukai semina bejaku sengapa aja.
Ba atur pengawa nya, Abang Johari mega madahka pemansang di Pasar Batu Tujuh suba pan asil ari pengawa pemesai Barisan Nasional (BN) Sarawak.
“Kami udah mai pemansang di sitak tu, sereta sitak ke besemak enggau endur tu, dataika kita ditu bisi palan bebeli barang lalu nama pan ditukar ngagai Kota Sentosa.
“Perintah mega ngemansangka Kuching Sentral, lalu diatu benung metambu ngaga Terminal Penerebai Tambang Murah ( LCCT) enggau kerejasama Air Asia,” ku iya.
Ba atur pengawa ke digaga ulih Opis Penerang nya, Abang Johari mega madahka Perintah ngungkup geran ninting taun ngagai sekula China di menua tu, ungkup RM7 juta mantu sekula China di menua tu ke taun 2018.
Kelimpah ari nya, iya mega ngemendarka ungkup urung RM500,000 diberi ngagai Sekolah Jenis Kebangsaan (SJK) Sam Hap Hin, Kota Sentosa, kena sekula nya ngemanahka agi infrastruktur di sekula nya.