Pengawa nyendiaka ikan sungai disadang ulih nambah 50 peratus

TEMERLOH: Opis Menteri Bumai enggau Industri Betanam Betupi bisi tagit nyendiaka ikan sungai manggai 50 peratus dikena nangkup peminta makit dalam menua datai ba taun 2020.

Sapit Menteri iya, Datuk Seri Tajuddin Abdul Rahman madah, naka diatu, penyampau asil ikan ulih ambi nengah chara akuakultur nya semina 30 peratus dibida asil ikan tasik ti ngerikot 70 peratus.

“Penyampau ga pemansut ikan sungai enggau asil ikan tasik 30:70 lalu iya agi enda sebela taja ikan tasik deka napi penanggul suntuk bekal maya musim landas. Raban berikan enda ulih nurun ke tasik ngulihka ikan maya musim nya lalu tu ngujungka bekal ikan di menua kurang.

“Penanggul tu ulih diputar enti bekal ikan sungai chukup, nya alai kitai netapka tagit penyampau ga pemansut ikan sungai enggau ikan tasik 50:50 datai ba taun 2020,” ku iya.

Iya mansutka jaku nya ngagai pengarang berita pengudah bejadika Pengawa Nutup Pesta Memancing Temerloh di Estet Paya Lanar, Kampung Mempatih semak Lanchang kemari.

Pengawa nya mega bela digulu Chairman Komiti Dagang Temuai enggau Main Asal Pahang, Datuk Seri Mohd Sharkar Shamsudin, Ketuai Direktor Pengawa Berikan Datuk Munir Mohd Nawi sereta Direktor Pengawa Berikan Pahang Azahari Othman.

Antara program dipejalai rambau pengawa nya baka pekit nginti, mayuh bengkah pengawa mandangka asil betanam betupi, mandangka pengawa nyediaka ‘snow fish’ enggau rumpai laut sereta pekit berapi.

Ku Tajuddin, antara pengelebih ikan sungai iya nya ulih ditupi dalam sangkar tauka pegung sepanjai taun nadai ngira musim lalu naka diatu bisi 22,000 betupika ikan sungai di serata menua ti mansutka asil purata 500,000 tan metrik setaun.

“Seraya asil dipansut ari ikan tasik iya nya 1.1 juta tan metrik setaun. Kitai begunaka tambah ikan sungai dikena nyemelaka kededua pemansut tu,” ku iya.

Iya madahka strategi dikena nyapai tagit nya iya nya enggau meransang mayuh agi peranak nupi ikan sungai di menua sida kelebih agi di genturung pendiau.

“Diatu mayuh orang sebanaka rega barang niki. Kitai tau mutarka iya enggau nambahka asil penatai pemisi diri lalu siti ari chara nengah pengawa nupi ikan sungai, tu ukai semina tau nambahka asil pemansut ikan tang mega tau nempa peluang dalam sektor bukai baka eko dagang temuai di menua nya.

“Kitai tau nyediaka servis pegung nginti enggau rumah temuai dikena matak bala temuai ke alai tu meri nilai tambah ngagai sektor betupi ke bisi diatu,” ku iya. — Bernama