Rh Mendali palan keterubah endur ‘Karnival KEMAS 4U Semarak Desa’
LIDONG (Betong): Rumah Mendali Buyung Panjai, Bangat nempa sejarah lebuh nyadi palan ngatur keterubah Program ‘Karnival KEMAS 4U Semarak Desa’ Renggat Nengeri Sarawak.
Program diatur Opis Pemansang Mensia Mayuh (KEMAS) Pelilih Lubok Antu udah dipenyadi Kaban Kunsil Nengeri (ADUN) Engkilili Dr Johnical Rayong Ngipa.
Program nya mega bisi digulu Sapit Direktor KEMAS Nengeri Sarawak Joseph Unsung.
Dr Rayong lebuh bejaku bejadika madahka program nya endang chukup manah dikena ngaul rat servis perintah begulai enggau rayat.
Pekara tu ku iya udah ngemai sereta meri servis perintah ti jauh agi pangka ngagai raban diselinting nengah aktiviti KEMAS sereta kerejasama strategik iya enggau raban diselinting.
“Program Karnival 4U tu mega mantu ngelakuka program enggau aktiviti KEMAS sereta kerejasama strategik ejensi enggau opis perintah di renggat baruh.
“Tu mega nambahka pangka sistem gawa perintah kelebih agi ngaul raban diselinting di menua pesisir ti ngaul sida enggau mayuh bengkah ejensi perintah, nyengkaum peribit enggau gerempung ukai dikuasa perintah (NGO),” ku iya.
Ku Dr Rayong nambah, tu bisi pengulih ngemesaika akses enggau nyediaka awak pelajar, dagang enggau kereja ngagai mayuh renggat umur.
“Kitai mega berati enggau silik, program diatur KE- MAS sekali tu nyadi pelasar ngenegap sereta ngerapitka tanggam kaul kelimpah meransang semangat kerejasama antara rayat, bala ketuai enggau perintah ti megai kuasa, iya nya Barisan Nasional (BN),” ku iya.
Pia mega ku iya, seriris enggau misyen enggau visyen perintah nengeri di baruh pegai Kepala Menteri Datuk Amar Abang Johari Tun Abang Openg ti chukup keran negika hak Sarawak, sebedau tu lenyau ngagai bala ketuai perintah besai, seraya ngemai rayat nguasa ekonomi digital.
“Kitai beratika pangku pengawa KEMAS diatu udah jauh berubah ari semina fokus ngagai pelajar tumu nembiak mit, ngagai pangku pengawa besai agi. Antara iya, meransang raban diselinting kelebih agi indu ngaul diri dalam bidang kraf jari, berapi, dagang mit enggau ke bukai.
“Ari nya, iya deka nyungkak ekonomi ruang bilik, nentuka visyen perintah ti deka meda rayat bepenatai pemisi lebih ari RM4,000 sebulan datai ba taun 2020 dijapai,” ku iya.
Berebak enggau nya, Joseph mega bisi bejaku, madahka Rumah Mendali nyadi palan keterubah ngatur karnival sekali tu.
“Bisi 10 karnival ti sama udah diperambu, deka diatur di serata Sarawak lalu Rumah Mendali chukup betuah laban KEMAS Lubok Antu udah ngangkatka nyadi palan keterubah karnival, nerima kerejasama ejensi perintah baka Opis Bomba enggau Penyah Penusah, polis, RELA, klinik pengerai sereta perank rumah panjai,” ku iya.
Nyerumba program nya, Dr Rayong mega bisi nyuaka geran Projek Mit Pemansang Menua Pesisir (MRP) penyampau RM10,000 ngagai Komiti Pemansang enggau Pengelikun Genturung Pendiau ( JKKK) Rumah Mendali.
Sama bisi datai Pemesai Ngatur Pengawa Sarawak Pelilih Lubok Antu Brin Munsang, Pemesai KEMAS Pelilih Lubok Antu Marinda Steward, PGB1 Henri Jugah, Pemesai RELA Pelilih Lubok Antu Mohd Syazwan Al- Amin, Pemesai Perubat PKB Betong Indra Safri Khusairi, Penghulu Betuk Tubi, Penghulu Nyambong Maweng, bala kaunsilor, tuai rumah sereta bala bukai ke datai ari ngelingi Lidong, Skrang Ili, Betong sereta Engkilili.