Bidang STEM ulih mantu S’wak nyadi nengeri pemadu maju manggai 2030, ku Yakub
MUKAH: Roadshow Project Of Dreams Realized (PRODR) ulih ngelakuka bidang Sains, Teknologi, Kejuruteraan dan Matematik (STEM).
Kaban Kunsil Nengeri ( ADUN) Balingian Abdul Yakub Arbi berkata, Tabung Ekonomi Gagasan Anak Bumiputera Sarawak (Tegas) sedar semina bidang nya ulih mantu nengeri tu nyadi nengeri pemadu maju manggai taun 2030.
“Diatu ditemu semina 19 peratus raban nembiak ngaul diri dalam bidang STEM, ke amat kitai patut abis nadai 40 peratus,” ku iya rambau pengawa bejadika Jerayawara PRODR Tegas 2018 bepalan di Mukah kemari.
Nitih ku iya, semina bidang nya aja ulih nangkup orang gawa ti dipinta ba semua serak pengawa pemansang di nengeri tu lalu pekara tu endang berat.
Abdul Yakub ke mega Kaban Kunsil Direktor Tegas madah, antara chunto orang gawa ti dipinta dalam bidang STEM kelimpah teknik enggau vokasional iya nya dalam Koridor Kuasa Ulih Dikena Baru Sarawak (SCORE).
Nya alai, pangku pengawa meri penyedar ngagai bala nembiak ba pemesai guna kaul dalam bidang STEM patut dipegulai ukai semina nengah perintah aja, tang mega institusyen pelajar, apai indai sereta bala komuniti di menua nya.
Jerayawara pelajar enggau kereja pemadu besai di Sarawak nya ku iya ke bukai bela ngelakuka STEM ngagai bala pengusung.
Kelimpah ari nya, Tegas mega ku iya bela ngelakuka bidang STEM nengah bemacham program bukai ti seruran diatur sida.
Jerayawara PRODR Tegas sekali tu iya nya keempat pengudah keterubah iya diatur dalam taun 2015.
Sepenyampau 45 ti datai ari mayuh bengkah institusyen pelajar sereta kereja bela ngaul diri dalam jerayawara nya ti nyelinting bala nembiak lepas Sijil Pelajaran Malaysia (SPM) enggau Sijil Tinggi Pelajaran malaysia (STPM).
Jerayawara nya diatur pengelama dua minggu berengkah ari Lundu lalu dipelaba tembu dalam pun bulan April ba endur kepenudi iya, iya nya di Lawas.
Sama bisi datai Residen Mukah Awang Johari Awang Mustapha enggau Ketuai Raban Bansa Mukah Hendy Suhai.