Nya kebuah perintah nengeri ngemendarka agih RM174.8 juta dikena ngemujurka 35 SPK enggau SPS ba serata Sarawak
SADONG JAYA: Perintah naka ulih nentuka rayat di nengeri tu ngembuan rumah ke lantang sereta berurun.
Sapit Kepala Menteri Datuk Amar Awang Tengah Ali Hasan madah, ungkup tuju nya perintah nengeri ngemendarka agih RM174.8 juta dikena ngemujurka 35 Skim Nangkir Genturung Pendiau (SPK) enggau Skim Gempuru Baru ( SPS) ba serata Sarawak.
“Tu mih pengawa perintah dikena meri peluang ngagai mensia mayuh ba genturung pendiau bulih lot rumah ke lebih berurun laban genturung pendiau ke alai diatu udah sekut,” ku iya.
Iya madah munyi nya rambau aum pemberita pengudah bejadika pengawa ngerenchah tanah Skim Nangkir Genturung Pendiau Sadong Jaya ditu, kemari.
Awang Tengah madah agih belanja ke dikemendar nengah Langgur Pemansang Malaysia Lumpar Ke-11 (RMK-11) nya, urung RM41.36 juta diagih ngagai bagi menua Samarahan dikena ngemujurka lima SPK.
“Fokus kitai mayuh ngagai SPK lalu ba Samarahan tu aja perintah udah ngemendarka ngagai kitai dikena ngemujurka lima SPK enggau agih RM41.36,” ku iya.
Menteri Pemansang Mengeri enggau Pengeraja Asal nya madah pengawa nangkir genturung pendiau nya seruran diperatika perintah lalu deka ngemeratka pekara tu ba pansik tengan RMK-11 tu.
Tu mih pengawa perintah dikena meri peluang ngagai mensia mayuh ba genturung pendiau bulih lot rumah ke lebih berurun laban genturung pendiau ke alai diatu udah sekut. Datuk Amar Awang Tengah Ali Hasan Sapit Kepala Menteri Sarawak
“Kitai nemu agih mayuh peminta ke diguna komuniti di menua pesisir.
“Nya alai, pajakka sukung ngagai perintah ke diatu ngambika semua perambu ke dipejalai ulih digaga enggau mujur,” ku iya.
Ngelansa pasal projek SPK Kampung Sadong Jaya, Awang Tengah madah, tu begunaka ungkus RM8.71 juta baka dikena nyendiaka 290 lot rumah enggau ngembuan mayuh komponen rizab perintah enggau industri ‘desa’.
“Kelimpah nya, kitai mega deka nyendiaka perengka guna bukai baka masjid tauka surau ditu,” ku iya.
Sama bisi datai, Menteri Muda Jalai Tebing Pantai Datuk Julaihi Narawi, ADUN Stakan Dato Sri Mohammad Ali Mahmud, ADUN Simunjan Awla Dris, Sapit Direktor Opis Tanah enggau Survei Abdullah Julaihi enggau temuai ke bukai.