Ulah semina ngira diri aja suah ngujungka rumah panjai pechah
SRI AMAN: Ulah semina ngira diri empu sereta enggai nerima penemu orang bukai antara pun pekara ti ngasuh rumah panjai di nengeri tu pechah dua lalu bisi dua iku tuai rumah.
Sapit Menteri Dalam Menua, Datuk Masir Kujat madah, ketegal enda lantang ati sereta enda sepenemu ke alai bisi rumah panjai pambar lalu nyiri tuai rumah ke baru taja rumah panjai nya udah bisi tuai rumah.
Kenu ku iya, ketegal pekara nya, bisi sekeda raban nyalahka pengari rayat di sitak nya laban puntan mutarka penyarut antara bala tuai rumah.
“Penanggul tu patut diputar begulai lalu raban nya patut duduk baum lalu anang sesekali pambar laban di rumah panjai tebal agi kaban belayan diri empu,” ku iya.
Iya ke mega Kaban Parlimen (MP) Sri Aman mansutka jaku nya lebuh bejadi ba Program Pemesai Begulai Enggau Rayat di Nawie Sini, Semulong Ulu Lingga semak ditu, kemari.
Pia mega ku Masir, enti pambar, mar perintah ngemai pemansang ngagai rumah panjai nya, kebuah pia laban peranak enda sepenemu agi sereta bisi dua iku tuai rumah lalu bebida penemu.
“Ketegal pekara nya mega rumah panjai enda ulih dikemansang lalu sida ti nerima pangka ari penanggul nya endang rayat ke diau mendam di rumah panjai nya,” ku iya madah nyemetak.
Nya alai Masir mega ngelalau bala tuai rumah di sitak dipegai iya, enti sema rumah panjai bisi dua iku tuai rumah ngambika sida bekerejasama sereta anang bisi laya enggau pangan diri.
“Manding endar enti rumah panjai bisi siku ketuai ti manah sereta bisi tanggungpengawa ngagai nembiak redak iya sereta nadai penyarut.
“Enti bisi dua iku tuai rumah, aku ngarapka siku ari seduai patut ngalahka diri lalu enda manding endar rumah panjai bisi dua iku tuai rumah,” ku iya nandu.
Sama bisi datai Kaban Kunsil Nengeri ( ADUN) Bukit Begunan, Datuk Mong Dagang, Sapit Residen Pemansang Bagi Menua Sri Aman, Philip Peter Salam, Pemesai Opis Pekara Khas ba DUN Bukit Begunan, Jesi Bintoh, Penghulu Belie, bala ketua opis sereta bala ketuai komuniti ke bukai.
Berebak enggau program nya, Masir mega bisi nyuaka geran perintah ngagai beberapa buah JKKK di Sitak Semulong Ulu Lingga.