Peresa baru status pemilih beumur 95 taun keatas

KUCHING: Komiti Pengawa Bepilih (SPR) patut meresa baru status pemilih beumur 95 taun enggau ke tuai agi ti agi bisi dalam lis rejista pemilih.

Sapit Ketuai Nembiak Parti Keadilan Rakyat ( PKR) Sarawak, Jeffery Mok Hui Chung madah tu dikena nyeliahka sebarang pekara ti dikenggai nyadi nyengkaum salah guna raban ti enda manah runding maya pengawa bepilih.

Mansutka pekara tu, Jeffery begulai enggau beberapa kaban PKR udah ngulihka salin nama pemilih ungkup timpuh suku keempat 2017 ungkup sitak Parlimen Miri dalam minggu nyin tadi.

“Pekara ti diulih kami ari sistem pemadah balat ngasuh tekenyit laban bisi 146 pengundi ti ulih ngundi beumur 95 taun enggau ti tuai agi sereta 113 pengundi ulih ngundi beumur 100 taun enggau ti tuai agi, penyampau semua sida tu manggai 259 iku,” ku iya.

Jeffery mansutka pekara tu rambau aum pengarang berita ba Opis PKR Stampin ditu, kemari.

Ngenang silik ku iya, pengundi ke pemadu tuai dalam Parlimen Miri beumur 116 taun.

Iya mega nanya sekalika bala pemilih tu agi idup.

Ku Jeffery, enti sema pemilih nya udah parai, nama sida patut dikeluar ari lis pemilih.

Ku iya, tuju pengawa tu iya nya nentuka atur proses pengawa bepilih ila lanchar, lurus enggau beresi.

“Enti pekara tu diteju enggau nadai dipatau, enggaika lis nama pemilih deka dipasuk dalam pengawa bepilih besai ti deka datai.

“Enda ulih dikeenggai, sekeda peranak tau panjai umur tang enggau penyampau (lis) tu, mar deka dipechaya,” ku iya nyemetak madah.

Ukai deka nyakap pengamat sistem pemadah nya, iya minta raban SPR nyerenih baru sereta meresa silik lis pengundi sebedau pengawa bepilih besai ti deka datai.

Berebak enggau nya, iya mega mantaika di Parlimen Miri bisi 80,524 pengundi naka ke diatu.