Ngena peneleba politik ti mayuh ari renggat baruh endang beguna amat dikena bejalaika tanggungpengawa diatu

MUKAH: Kaban Parlimen Mukah Tan Sri Muhammad Leo Michel Toyad madahka Kepala Menteri Datuk Patinggi Abang Johari Tun Abang Openg siku ketuai ke pemadu engkeman ngiring nengeri tu.

Iya madahka peneleba politik ti mayuh ari renggat baruh endang beguna amat dikena bejalaika tanggungpengawa diatu.

“Dalam setaun lebih ngiring bala ketuai bukai, iya (Abang Johari) udah mayuh ngaga ubah nengah polisi perintah,” ku iya ba pengerami bejadika Pesta Balingian @Sesok 2018 apin lama ke udah.

Kepala Menteri udah mayuh meri penemu ti manah ke pemaik enggau pemansang nengeri.

Siri ari nya ku Leo, bekaul enggau pinta hak Sarawak ba Sempekat Malaysia 1963 (MA63).

Iya pechaya enggau ulah ketuai ke baka tu, Sarawak ba jalai ti betul nuju nengeri ke pemadu maju.

“Kitai deka meri sukung ngagai (Abang Johari) terus ngiring Sarawak,” ku iya nerang baru.

Berebak enggau nya, Leo mega ngelalau peranak kelebih agi di sitak Mukah, terus meri pengandal ngagai Barisan Nasional (BN) ba Pengawa Bepilih Besai Ke-14 (PRU14) ila.

Tu ku iya, nengah peneleba sereta kelai perintah ti merintah diatu seruran ulih napi bemacham penanggul enggau pemar kelimpah jaku pejah ari raban bukai kelebih agi penyakal.

Sama bisi bejaku Abang Johari enggau Kaban Kunsil Nengeri (ADUN) Balingian Abdul Yakub Arbi.

Dalam setaun lebih ngiring bala ketuai bukai, iya (Abang Johari) udah mayuh ngaga ubah nengah polisi perintah. Tan Sri Muhammad Leo Michel Toyad Kaban Parlimen Mukah