Dadah: Teritka atur ba pintu penama ke S’wak
KUCHING: Atur ba pintu penama di nengeri tu patut diteritka dikena ngemuntanka penyalah mai dadah ari menua luar ke Sarawak.
Menteri Dagang Temuai, Seni, Main Asal, Nembiak & Lumba enggau Main, Datuk Abdul Karim Rahman Hamzah madah, dadah ke bisi di Sarawak dipelabaka tebal agi di bai tama ari luar nengeri tu.
Iya madahka chara ngemuntanka pengawa mai dadah tama ke Sarawak sebengkah ari pekara ti dikerandau dalam Aum Majlis tindakan Membenteras Dadah (MTMD) Peringkat Negeri Sarawak Bil. 1/2018, kemari.
“Aku berani madahka iya nya dadah tu dibai masuk ari luar. Tadi kami udah berandau panjai baka ni deka ngemuntanka dadah nya dibai tama ke nengeri tu.
“Sebengkah ari ke dikerandau kami iya nya nambahka penerit atur ba pintu penama sekalika ba servis pos, garis entara menua, palan penyangkai kapal tauka padang bilun.
“Nambahka nya kami mega selubang penemu iya nya entara ti efektif dikena mutarka pekara tu iya nya nambahka penyampau ukui penyidi laban Sarawak besai, ke diatu bisi enam iku aja ukui penyidi iya nya tiga ba Kastam enggau tiga ba Polis ke nyaga semua pintu masuk,” ku iya.
Abdul Karim mansutka pekara nya dalam aum pengarang berita, Aum Majlis Tindakan Membenteras Dadah Peringkat Negeri Sarawak Bil 1/2018 ke diatur ba Bilik Baum Ringkat 9 Begunan Sultan Iskandar ditu.
“Aku sanggup mai penanggul tauka pekara tu ngagai kabinet nengeri ngambika perintah nengeri mantu mutarka penanggul tu nyema perintah besai tauka opis tiu bekaul ke bisi unit ukui betapi penanggul meli tauka bulih ukui ke dilatih tu.
“Laban kitai amat begunaka ukui ti mayuh, dikena nyaga nengeri tu ke besai,” ku iya ti nyadi Chairman Gerempung Nagang Dadah Malaysia (PEMADAM) Nengeri Sarawak.
Berebak enggau tu iya madahka dadah ukai semina tama ngagai sesebengkah mengeri aja tang diatu udah mungkur semua mengeri di nengeri tu.
Iya madahka seiti ari kebuah berindik ari ubah ba penyambung tauka pemansang infrastruktur iya nya lebuh jalai majak manah digaga dia ngemuntangka pengawa orang mai dadah tama ke nengeri tu.