Mayuh projek ari perintah patut diterangka ngagai nembiak redak ngambika sida nemu tiap renggat pemansang ti dipejalai

SRI AMAN: Semua renggat ketuai komuniti nadai ngira tuai rumah, penghulu, pemancha enggau temenggung dipinta seruran meri kerejasama rat ngagai perintah ti ulih pulaika pemansang nembiak redak ba sitak dipegai sida.

Tu berindik ari bisi mayuh projek pemansang benung dipejalaika perintah patut ditemu sereta diterang ngagai rayat ngambika sida enda tinggal ari ngasaika perengka guna tu, pia ku Sapit menteri Dalam Menua II, Datuk Masir Kujat.

Iya ke mega Kaban Parlimen (MP) Sri Aman mansutka jaku nya lebuh bejadika Aum Serakup Ketuai Raban Bansa Bukit Begunan bepalan di sebengkah hotel tebilang semak ditu.

Ku iya, bala ketuai raban bansa patut bejalaika pangku pengawa besai ngerembaika penerang betul sereta lurus baka projek pemansang di menua sida,” ku iya.

Pia mega ku iya, rayat enda patut dikelaung ari nerima projek pemansang ari perintah.

Nya kebuah pangku pengawa enggau tanggungpengawa ketuai raban bansa endang ditagih ngambi nerangka projek pemansang ti benung tauka ke bisi diatu seruran diasaika sida.

Taja pia, iya mega nyemetak madah tetiap penerang pasal pemansang ti dikenatai ngagai rayat anang dibalut enggau penanggul diri tauka penanggul bukai laban deka ngasuh rayat saru penemu.

“Aku ngelalau ngambi te- tiap penerang bekaul enggau pemansang patut disukung enggau pekara nyata lalu ketuai raban bansa patut ngiga alternatif pemadu manah, ambika chunto, seruran gawa begulai enggau ejensi perintah ngambika penerang enda ngasuh saru penemu,” tandu iya.

Kelimpah ari nya, iya ngelalau sida anang sesekali ngena chara muntang baka nengah penyakal mutarka sekeda isu tauka penanggul ke bisi nyadi laban iya irau ulah penyakal ti dipeda baka beambi ulih, tentu deka nguntungka sida.

“Patut dikeingat, ketuai raban bansa nyadi orang tengah, nyadi mata enggau pending perintah, sida patut nyeliahka diri ngambi enda alah penemu penyakal ba isu pemansang enggau mutarka penanggul ke bisi nyadi,” ku iya madah nyemetak.

“Nyadi pengari rayat ditu, aku enggaika raban nadai tanggungpengawa besalahka perintah enti sema isu nya udah dibantaika ngena chara enda manah ari bala penyakal.

“Endang nyadi tanggungpengawa aku enggau mega semua ketuai raban bansa bekerejasama sereta besaup enggau pangan diri nentuka rayat patut nerima pekara ti dikedeka sida.

“Kena jalai ti betul lalu anang kelalu ngandalka penyakal mutarka penanggul kita laban ulah penyakal dikesema baka gawa nadai enggau ati keran,” ku iya.

Sama bisi datai ngulu program nya Penghulu Belie, Kaunsilor Menjang Niah, Kaunsilor Selimin Kring sereta bala ketuai raban bansa ke bukai.

Aku ngelalau ngambi tetiap penerang bekaul enggau pemansang patut disukung enggau pekara nyata lalu ketuai raban bansa patut ngiga alternatif pemadu manah, ambika chunto, seruran gawa begulai enggau ejensi perintah ngambika penerang enda ngasuh saru penemu. Datuk Masir Kujat Sapit menteri Dalam Menua II