Main asal identiti ti patut dikemegahka tetiap pupu bansa

MIRI: Main asal iya nyan identiti ti patut dikemegah tetiap pupu bansa, lalu ari pengeransing deka negika penyelai identiti bansa Iban tetiap Gerempung Ukai Dikuasa Perintah ( NGO) anang sanggu bejalaika pekit ti ulih nentuka main asal bansa Iban enda lenyau diserunyut jeman, pia ku Presiden Raban Ngepan Iban (RNI) Steven Abas Patrick Agus lebuh ti meri jaku pengelalu iya maya malam Pekit Pengelandik Keling Kumang RNI Renggat Nengeri Sarawak 2018.

“Aku ngarapka nengah pelasar ti udah disediaka kami (RNI) tu, raban nembiak kelebih agi ari bansa Iban enda sanggu belajarka main asal lalu ngena awak tu mantaika pengelandik diri.

“Kami ngenggaika raban nembiak ti ngerejista masuk pekit bansa tu semina datai enggau pengelandik ti puang lalu semina ngarapka pemajik tauka penyigat diri aja, tang sida enda ngemeratka main asal ti mega sebengkah ari penyelai identiti bansa kitai Iban,” ku iya lebuh bejaku ba mua bala mayuh ba sebuah palan bebelika barang di Miri bedau lama.

Kelimpah ari nya, Steven ngarapka tu ulih nyadi pemungkal ngagai NGO bukai dikena sama bela bejalaika pekit ti sebaka ngambika main asal enggau ngepan bansa Iban ulih terus dinanka nyentuk ke jemah ila.

“Aku ngarapka tu ulih nyadi chunto ngagai NGO bukai ti sama bela deka ng- atur pekit ti sebaka ngambika bisi nyediaka sekeda awak endur mantaika main asal ngambika semua pekara tu ulih terus seriris lalu enda lela enggau ubah jeman kemaya hari,” ku Steven nyemetak.

Ba kenang ke bukai, temuai dipebasa bejadika pekit nya Menteri Muda Dagang Temuai, Seni enggau Main Asal, Datuk Lee Kim Shin mega bisi madah main asal tu ukai pekara ti ulih luya. Tu nentuka identiti tetiap bansa lalu nyema nadai piak ti negika main asal bansa diri, raban nembiak kemaya hari deka mudah nundaka gaya pengidup ti enda menuku.

“Main asal tu ukai utai ti nemu luya. Tu kelai identiti bansa kitai, lalu kitai meseti berani negika identiti tu ngambika terus dikemeran lalu enda lenyau pia aja,” ku Lee ke mega nyemetak madahka penyelai main asal ke dikembuan ulih nyungkak tikas ekonomi dagang temuai.

Rambau pengawa nya, Lee udah nyuaka bantu sepenyampau RM15,000 dikena gerempung tu bejalaika aktiviti sida.

Pemutus pekit pengelandik tu udah ngayanka pengari ari sitak Sri Aman, Frevirra Pearl menggi gelar Kumang Pengelandik Adat enggau Main Asal RNI 2018 ti mantaika pengelandik iya ‘Bejawang Ai Ansah’ lalu Keling Pengelandik Adat enggau Main Asal RNI 2018 diempu pengari sitak Kapit, Hendrick Anthony ti mantaika pengelandik ‘Pantun Sabak Pulai’. Seduai bela mai pulai mata duit RM500, selampai sereta bungai.

Ungkup mensia mayuh ti deka ngemataka pekit renggat kepenudi Pekit Keling Kumang RNI Renggat Nengeri Sarawak 2018 ulih ngenataika diri ke Dewan Suarah Miri kena 14 April 2018 lalu tikit bisi dijual ti berega RM50, RM30 enggau RM20.

NEGIKA MAIN ASAL IBAN: Steven (bediri, tujuh kanan) begambar ungkup kenang begulai enggau Frevirra (bediri, lapan kanan), Hendrick (bediri, semilan kanan) sereta bala akim enggau pemekit ke bukai ti bisi maya malam nya.

TERIMA KASIH: Lee (tiga kanan) nyuaka chek ngagai Steven (tiga kiba) seraya dikemata Eric (dua kanan), Duta RNI 2017 Adriel Nyawai (kanan) enggau Selinggar Matahari RNI 2017 Roseda.

LANDIK SERETA BAJIK: Frevirra ti ngarika sitak Sri Aman udah ngayanka pengelandik ti endang narit ati semua orang ti bisi datai ngemataka pekit malam nya.