Kampung Sungai Maong enda lama agi deka nyadi kampung Melayu moden

KUCHING: Genturung pendiau Melayu Kampung Sungai Maong enda lama agi deka nyadi sebuah genturng pendiau Melayu moden dalam kandang Bandaraya Kuching, ku Kepala Menteri Datuk Patinggi Abang Johari Tun Openg.

Siti ari pemungkal pengawa ke deka digaga ngubah genturung pendiau nya,iya nya sebuah jalai deka digaga dia, nyambung ari jalai besai ke pengabis semak enggau genturung pendiau nya, ku iya madah lebuh ngelawa Kampung Sungai Maong kemari.

Iya nandu baru madahka, iya deka minta Opis Kereja (JKR) ngaga pansik dulu sebedau ngiga chara ngubah jalai genturung pendiau nya baka kediatu, nyengkaum ngaga jematan.

Iya madah munyi nya lebuh bejaku ba mua mensia mayuh pengudah besembiang enggau komuniti di genturung pendiau nya di Mesgit Darul Istiqlaal.

Baka kediatu, orang ke ngelawa genturung pendiau nya mesti nengah jalai sempit lalu nengah sebuah jematan mit, kelimpah ari meling jalai sebedau nengah jematan mit, siti ari pengadang ku Abang Johari, ke ngarapka jematan nya deka dirubuhka, lebuh jalai baru ngagai genturung pendiau nya deka digaga enda lama agi.

“Aku seruran bisi perambu, mai pemansang ngagai sitak tu, lalu tu maya iya, pemansang tu deka nyadi. Ke pemungkal iya, kitai enda tau enda ngaga jalai ke manah ngagai genturung pendiau tu sereta perambu pemansang jalai baru genturung pendiau tu deka dipunka ari diatu ngagai 2019 tu ila,” ku iya.

Kelimpah ari nya, iya madah sebuah jematan baru mega deka nyadi sebagi ari jalai alun nya, ke deka digaga dalam urung RM10 juta.

Pengudah jalai sereta jematan nya tembu ila, genturung pendiau nya deka nyadi nyulut agi ari ke udah, lalu nyadi sebagi ari bandaraya tu.

Abang Johari ti mega nyadi Menteri Perambu Mengeri enggau Rampa Menua madahka semak genturung pendiau nya mega deka digaga alai palan rumah mensia mayuh.

“Aku madah ngagai kita, semua pemansang tu deka ngambi timpuh ke panjai. Tang taja pia, aku ngarapka kita deka majakka sukung kitai ngagai kami,” ku iya.

Enti jalai ngagai genturung pendiau nya tembu ila, jalai nya mega ukai semina nyambung ari jalai besai tang iya mega ulih ditengah ngagai Kampung Segedup di Batu Kawa.

Ba atur pengawa nya, Abang Johari meri geran ngagai Mesgit Darul Istiqlaal kena sida iya bejalaika pengawa di mesgit nya.