Anang ngasaika diri kurang ari nembiak bukai, ku Abdullah ngelalau nembiak sekula ke enda mujur ba akademik

BINTULU: Nembiak sekula patut lantang belajar di sekula, lalu sida iya enda patut ngasaika diri kurang penemu ari nembiak bukai, ku Menteri Muda di Opis Kepala Menteri ( Pekara bekait enggau Korporat) Abdullah Saidol.

Iya madah enti deka nyadi orang ke mujur, siku orang nya enda tau enda ngembuan peragam ati sereta ulah ke ulih meransang sida iya empu nyapai pemujur kedeka sida iya.

“Aku pechaya sida ke 10 iku ba lis atas enda ibuh irau ba penyadi sida iya ila, tang taja pia bala nembiak ke di luar 10 pengabis atas, anang rawan ati.

“Enti kita deka nemu, aku pan kala dalam raban ke ukai ba lis 10 nama ke atas dalam kelas aku, tang dalam ati aku, deka nembuka pelajar aku, nyambung pelajar aku enggau naka ulih,” ku iya madah lebuh ngepunka pengawa pemandang ‘Project of Dreams Realised (PRO-DR)’ ditu, kemari.

Pengawa pemandang nya diatur ulih Tabung Ekonomi Gagasan Anak Bumiputera Sarawak (Tegas).

Entara pengawa besai ti bisi dipandangka dalam atur pengawa nya, bekait enggau pelajar sereta pengawa latih, ijinsi ke nyendiaka lun enggau sekulasip, licha bekait enggau pelajar, bengkel pengelandik, chabut betuah sereta pekit quiz.

Sama bisi enggau ngulu atur pengawa nya kemari, Ketuai Pegawai Operasi Tegas, Awangku Merali Pengiran Mohamed.

Abdullah mega ngelalau bala nembiak nguji semua pemanah lebuh agi besekula, lalu nguji nyadi orang ke nyulut dalam pelajar sida iya.

“Aku nguji semua pemanah nyadi nembiak di universiti, aku orang ke manchal tang aku betatika pelajar aku,” ku iya.

Iya mega ngelalau sida iya begulai enggau manah, enggau bala pangan sida iya, lalu gaga kaul enggau pangan diri, laban bisi maya ila orang tu ke deka nyadi orang ke berat dalam pemujur cherita sida iya.

Ba jaku iya mega, iya ngelalau bala nembiak ngangkatka Jaku English.

“Enti kitai deka datai ba renggat dunya tauka global, ukai semina champian ditu aja, Jaku english nya meh ke enda tau enda dipelajar bebendar,” ku iya.

Iya nandu baru madahka, Sarawak ngembuan penyampau mensia ke enda mayuh, dalam urung 2.7 juta, enggau 40 person ari penyampau nya, bala nembiak ke berumur 40 taun ke baruh.

Nya alai ku iya, dalam taun 2012, Tun Pehin Sri Abdul Taib Mahmud maya nya ku iya agi mangku nyadi Kepala Menteri, ke numbuhka Tegas, enggau pemerat tuju ngelatih bala nembiak menua tu ngambi pelajar teknikal, ke endang ditemu iya (Taib) deka nyadi pemerat menua tu jemah ila.

Dalam timpuh nya mega, Abdullah ti mega nyadi Sekretari Tegas ngelalau ketuai komuniti di pun menua bejalaika pengawa sida iya ngangkatka pelajar teknikal kelebih agi ngagai bala nembiak ke udah nembuka sekula sida iya ba sekula Perintah.

“Taja pan sida iya enda bepeluang nyambung pelajar sida iya ngagai universiti, tang agi bisi peluang ke sida iya ngangkatka diri empu dalam pelajar teknikal,” ku iya.