Raban nembiak dilalau ngembuan pemintar sereta berani ngiga kereja
MIRI: Rebak nembiak kemaya hari meseti anang kelalu bepanggai ba perintah ngiga pengawa dalam sektor perintah.
Mansutka penemu tu, Menteri Muda Kaunsil Kandang Menua, Datu Dr Penguang Manggil ngansak sida nembiak ti ngiga kereja ngambika pintar runding sereta berani ngiga kereja sida empu dulu.
“Mayuh bala nembiak kemaya hari graduet ba kus ti enda diakun tauka dikredit perintah, pelajar tauka gerempung profesional. Nya kebuah, nadai ejensi perintah ulih ngambi sida kereja.
“Taja pia, nyema kita chukup pintar runding sereta berani, kita tau ngagai sebarang sektor peribit, lalu aku berani nyamin kita deka ulih bulih kereja dalam sektor perintah.
“Endang enda patut kelalu bepanggai ba perintah meri kita kereja baka jam ke diatu,” ku Dr Penguang, nyaut tanya dibantaika nembiak nerima skolarsip maya sesi tanya saut ba forum ‘Townhall Jasa Jelajah Akar Umbi’ ungkup Parlimen Baram ti diatur di Balai Komuniti Beluru di Bakong apin lama ke udah.
Penguang nyemetak madah taja pan peluang kereja ungkup bala graduet ti lemi dalam Jaku English bisi tatak, agi bisi kompeni ti ulih nyendiaka kereja ungkup sida.
“Anang putus pengarap laban aku nemu pekara tu ukai pengujung jalai. Nyema kita berani ati, aku nemu kita deka ulih ngiga kereja ti manah,” ku iya nambah.
Berebak enggau nya Panel Pemikir Opis Pekara Khas (Jasa) ke mega nyadi Direktor Komunikasyen Strategik, Tun Faisal Ismail Aziz madah enda ulih dikeenggaika rebak nembiak kemaya hari betapi enggau pemar ngiga kereja.
“Tu engka ketegal pengawa ngelanjarka umur pinchin ti mai reti nadai mayuh pengawa ke bisi lalu maya nya nyadi, sida ti udah gawa enggau organisasyen deka meruan lalu sida ke baru deka mar masuk kereja,” ku Tun Faisal.
Kelimpah ari umur, ubah nyengkaum injin, sistem, software enggau peminta mega ulih nyadi kebuah penyampau kereja puang ke bisi tau kurang.
“Baka sida ti kereja ba tol. Diatu, mayuh orang ngena kad nya kebuah kereja majak kurang. Nya alai, ubah mega ulih ngasuh peluang kereja kurang ngagai raban nembiak rebak baru,” ku iya nambah.
Dikena nangkup pengawa puang ti majak kurang kemaya hari, perintah beratika pengawa meri peransang ngagai rebak baru ngaul diri dalam pengawa dagang, ku Tun Faisal.
“Mayuh program dagang udah diatur ungkup raban nembiak dikena nyendiaka sida enggau mayuh agi pilih lalu ukai semina beratka ngiga kereja tang bejalaika dagang kediri empu.
“Perintah mega udah ngaga zon nadai tatak dagang digital dikena meransang dagang edagang nengah internet lalu ngajar bala anak kitai ngaga dagang online,” he said.
Kelimpah ari nya, perintah mega fokus ngagai sida ti udah graduet enggau kus ti mar ngiga kereja, kus ti enda diguna dalam makit kereja kemaya hari.
“Perintah mega ngaga program Skim Latih 1 Ma- laysia (SL1M) ti nyadi sebagi ari komitmen dikena nambahka penau kereja enggau ngurangka penyampau sida graduet ti kerejaa,” ku iya.
Tun Faisal mega nyemetak madahka semina bisi mayuh peluang kereja nyema bisi projek pemansang ti deka dipejalaika perintah.
“Projek nya nyengkaum Pengerang Integrated Petroleum Complex (PIPC), Tun Razak Exchange (TRX), East Coast Rail Line (ECRL),enggau Jalai Besai Pan Borneo. Semua projek tu mai reti deka nyendiaka mayuh pengawa puang.
“Perintah seruran nentuka tetiap projek ti dipejalai nitihka pematut. Nya kebuah, beguna endar nemu nama penguntung diulih rayat di sekeda menua laban ukai semina perintah berundingka pemansang aja ba kandang menua nya, tang mega pengawa puang ungkup raban nembiak,” ku iya nambah.
Sama bisi datai ADUN Telang Usan, Dennis Ngau enggau Ketuai Jasa Bagi Menua Miri Lukanisman Awang Sauni.