Program ‘Perkhemahan Kadet Bomba’ mujur ngempung pupu bansa
MIRI: Program ‘Perkhemahan Kadet Bomba’ dipadahka program ti mai pemaik dikena ngempung pupu bansa, etnik sereta budaya lalu ulih ngadaka komuniti ti bedisiplin sereta komited.
Kaban Kunsil Nengeri (ADUN) Piasau Datuk Sebastian Ting madah nya seriris enggau batang tuju ti dikemerat dalam program nya baka nerenakka runding 1Malaysia sereta talukka pemanah kaul dalam siti tim.
“Aktiviti bansa tu ulih negutka kerejasama sereta sepenemu entara kaban dalam siti tim kadet bomba enggau Opis Bomba enggau Penyelamat Malaysia (JBPM).
“Kelimpah ari nya, tu deka negutka kerejasama entara JBPM Nengeri Sarawak enggau Opis Pelajar Nengeri Sarawak dalam ngatur mayuh agi aktiviti,” ku iya lebuh ti bejadika Pengerami Nutup Pekit Kadet Bomba di JBPM Zon 6 Miri ditu lemai kilah ensana.
Sama bisi datai ba pengerami nya Ketuai JBPM Zon 6 Miri Penguasa Kanan Bomba I Law Poh Kiong.
Sebastian ngelalau raban kadet bomba ngambi ngena semua awak ti bisi maya program nya dikena nambahka penemu sereta pengelandik dikena nyikap diri nyadi orang ti kering sereta regas dalam pengidup.
“Besemekih enggau manah ulih ngetanka ulah ti ulih bekerejaama dalam tim entara raban kadet,” ku iya.
Beserimbai enggau nya, program ‘Perkhemahan Kadet Bomba’ ti diatur JBPM Zon 6 nya ngaul semilan buah sekula iya nya Kolej Tun Datu Tuanku Haji Bujang, Sekula Sekondari (SM) Sains, SMK Agama, SMK Bekenu, SMK Baru, SMK Lutong, SMK Pujut, SMK Merbau sereta SMK Tinjar Baram.
Bisi 300 kadet enggau pengajar udah ngambi bagi dalam program nya ti bisi empat pekara ke dipekitiya nya pengawa bebaris operasyen rangkai kategori laki enggau indu, ‘aspec challenge’ laki enggau indu, pekit nyimpul tali kategori champur sereta kuiz.
Ba program ti sama, SMK Merbau udah dipaduka champion ungkup semua pekit kadet bomba nya.