JKNS komited ngenataika penerang bekaul nyaga pengerai

SADONG JAYA: Opis Pengerai Nengeri Sarawak (JKNS) seruran komited maya ngenataika penerang bekaul enggau nyaga pengerai ngagai raban bansa di nengeri tu.

Menteri ba Opis Menteri Besai Datuk Seri Nancy shukri madahka JKNS udah bejalaika chara ti efektif nengah pengawa numbuhka servis enggau program pengerai ke pengelantang mensia mayuh.

“Mayuh tanggungpengawa dipejalaika piak opis penge- rai dikena ngelakuka gaya pengidup bepengerai ngagai raban bansa.

“Pusat Promosi Kesihatan Komuniti ( PPKK) ambika chunto sebengkah endur nyendiaka servis ngelakuka pengerai ti diperambu ke deka meri penemu enggau pengelandik ngemeranka gaya pengidup ti bepengerai ngagai semua raban bansa berengkah ari anak anak mit, nembiak, orang biak enggau orang tuai,” ku iya.

Iya mansutka pekara nya lebuh bejaku ba pengerami bejadika Program Jalinan Kasih Bersama Pemimpin ti ngena rambai jaku ‘Komuniti Sihat, Komuniti Hebat’ ba Balai Mayuhguna Sadong Jaya ditu, kemari.

Nancy ti mega Kaban Parlimen (MP) Batang sadong madahka enggau penumbuh PPKK, raban bansa ba endur nya bisi peluang akses ngagai servis pengerai enggau lebih mudah.

“Aku deka meri terima kasih ngagai komiti pengatur ti mujur ngatur program tu enggau kerejasama Panel penasihat klinik Kesihatan, PPKK, Kumpulan Sokongan penyusuan Susu Ibu, Communication For Behavioural Impact ( COMBI) enggau Komuniti Sihat Pembina Negara ( KOSPEN),” ku iya.

Kelimpah ari nya iya madahka Opis Pengerai Bagi Menua Samarahan mega udah ngena sebengkah chara komunikasi ti diambi ari Pertubuhan Kesihatan Dunia ( WHO) iya nya nengah COMBI.

Ku iya, COMBI sebengkah chara dinamik ti ngena strategi mobilisasi sosial enggau komunikasi ke ulih mai ubah ngagai ulah orang seseiku, ruang bilik enggau raban bansa nuju ulah ti manah.

Nitihku iya, COMBI ulih meransang mayuh sektor raban bansa dikena mutarka isu dalam raban bansa lebih agi denggi.

“Apin lama kitai dikenyitka enggai penyakit denggi ti ngerekai ba sebuah genturung pendiau di pelilih menua Asajaya, lalu nengah sukarelawan COMBI kitai ngarapka penanggul pengerai ba endur tu ulih dijaga tauka ditagang enggau manah.

“Amat beguna raban bansa ngemeratka pengawa nyaga pemeresi kandang endur ngambika penanggul denggi nadai nyadi, beri awak diri 10 minit seminggu ngiga sereta munaska palan endur nyamuk aedes betelu sereta buai sampah ba endur ke betul,” ku iya.

Pengawa beripai ba genturung pendiau endang diperansang sereta manah, ambis kuarang tiga bulan sekali ngambika kandang endur genturung pendiau beresi sereta nadai penanggul enggau penyakit, ku iya.

Bisi datai Kaban Kunsil Nengeri ( ADUN) Sadong Jaya Aidel Lariwoo enggau ke bukai.