Pemutus tu digaga dalam parti ke alai tetiap penuduk nya ukai diempu sesiku orang, tang diempu parti
KUCHING: Parti Rakyat Sarawak (PRS) tetap enggau pemutus ke alai penyandang sitak parlimen Selangau enggau Lubok Antu enda deka bediri ngenanka penuduk ba Pengawa bepilih Besai Ke-14(PRU14).
Presiden PRS Tan Sri James Masing madah pemutus enda agi nyabung Datuk Joseph Entulu ( Selangau) enggau Datuk William Nyallau (Lubok Antu) nya digaga parti.
“Pemutus tu digaga dalam parti ke alai tetiap penuduk nya ukai diempu sesiku orang, tang diempu parti.
‘Laban parti ngembuan hak nentuka sapa aja ke diasaika patut ba penuduk, baikka ba parlimen tauka sitak kunsil nengeri,’ku iya madah ngagai The Borneo Post kemari.
Ditanya sekalika kededua Nyallau enggau Entulu udah dipadah sentang pemutus nya, Masing madah “Aku mikir seduai udah nemu laban seduai ulih macha ba surat berita’.
Ngenang kaul bukai, Masing madah PRS diatu nelengaka pintu ngagai semua Dayak nyengkaum pengari rayat Dayak ungkup pemaik penyerakup Dayak.
“Aku dekaka parti tu tegap baka Parti Bansa Dayak Sarawak ( PBDS) ke dulu suba.
“PRS nelengaka pintu ngagai semua Dayak ungkup pemaik penyerakup Dayak lalu aku enda deka ngasuh orang ngeruga penyerakup tu.
“Kitai mega enggai ngasuh sebarang orang ngeruga parti tu kelebih agi sida ke dalam parti. Enti enda setuju, kita tau ningkilka diri ari parti,’ku iya.
Sapit Kepala Menetri ke mega ADUN Baleh nya madahka iya sanggup ngelaban sida ke nyakal baka ke ngelaban DAP enggau PAS sereta ngenggaika sekeda orang ke nyadi ‘musuh dalam selimut’.
Sentang pekara bukai, Masing madah Indu Opis PRS deka mindah ngagai begunan Yayasan Pendidikan Teknikal Rakyat Sarawak (Teras) di Jalai Alwi ke kala nyadi Indu Opis PBDS kena 31 Mac (sehari tu).
Berindik enggau nya iya meri terima kasih ngagai chairman (Board of Direktor) Teras ke mega kala nyadi presiden PBDS Tan Sri Leo Moggie ti meri pemendar ngagai PRS nyuwa opis ba begunan nya.
Entara sekeda ke nyadi kaban direktor Teras iya nya Masing, Dato Sri Daniel Tajem, Datuk Joseph Salang, Datuk Wilfred Nissom enggau pengari ari Opis Pelajar.
Laban parti ngembuan hak nentuka sapa aja ke diasaika patut ba penuduk, baikka ba parlimen tauka sitak kunsil nengeri. Tan Sri James Masing Presiden PRS