Pemujur ngelakuka produk nengah ‘online’ dipekunsi
KUCHING: Pemujur diri empu ngelakuka produk ngena chara ‘online’, muka runding Priscilla Michael, 36, deka bekunsi penemu enggau pengelandik nya enggau raban bansa ke bisi ati deka ngerembaika produk sida.
Priscilla, siku orang dagang ti ngasilka produk tauka barang kena ngias diri ari leka marik berengkah mekuh ngagai pengawa nya kenyau ari taun 2015 nyentuk ke diatu.
Entara produk ke diasil sereta dijual nyengkaum gelang kaki enggau jari, marik moden, antin enggau ke bukai
Nitih ku iya, dikena ngempunka dagang iya semina ngeluarka modal RM5 aja sereta asil tauka produk iya dijual ngagai bala bakih sereta nitihka peminta.
Tang asil ari teknologi moden iya nya ngelaku sereta bejual ngena chara online baka nengah Facebook enggau Instagram diatu ku iya, produk iya udah ngerembus makit luar ari Sarawak sereta teulihka penatai pemisi urung RM10,000 sebulan.
“Ba penemu aku bedagang ngena chara online tu manah baka ngelaku sereta nyual produk ngena Facebook, ari ti ngena Facebook bejai orang tauka ngereja utai ke enda manah.
“Ba aku empu kelimpah ari bisi pemeli dalam nengeri tu empu,naka ke diatu aku mujur ngerembaika produk aku tauka bisi peminta ari menua luar baka ari menua Kanada, US, Brunei enggau Jepun.
“Lalu juluk tauka pekara ke benung dikemeranka aku diatu iya nya deka ngajar sereta mantu orang dagang mit baka aku lebih agi ari genturung pendiau, ngelaku sereta nyual produk sida ngagai menua luar ngena chara online,” ku iya.
Priscilla dikerandau Utusan Borneo lebuh ke sama ngambi bagi muka bansal ba palan pemandang Karnival Online Networking Entrepreneurs (ONE) Suruhanjaya Syarikat Malaysia (SSM) ba CityOne Megamall ditu, kemari.
Iya sebedau tu bejalaika pengawa pengasih enggau sebengkah gerempung ukai dikuasa perintah (NGO), ngaga pemutus ngetu ari pengawa nya lalu ngemeranka pengawa ngaga enggau nyual barang ngias diri ari leka marik.
Dikena ngemujur sereta ngerembaika produk, iya ti nyadi pengepun P.M.Y Collections ngerejista kompeni iya nya enggau SSM ba taun 2015 nyerumba Karnival ONE SSM maya nya suba.
Pengudah berejista enggau SSM, Priscilla bisi bulih geran tauka bantu kereban ari Opis Menteri Pemansang Industri enggau Orang Dagang (MIED).
“Laban aku deka meda orang dagang mit baka aku ulih nyual produk ngagai menua luar, ba karnival ke sekali tu aku mai bala bakih ke sama ngasilka produk baka aku sama ngayanka asil sida ba bansal aku tu.
“Tu mih chara aku madah tauka mandang ke sida chara ngerembai tauka nempa kaul enggau mensia mayuh ke lebih agi ejensi.
“Aku mega meransang sida ngambika ngerejista produk tauka kompeni sida enggau SSM ke bisi muka bansal ba karnival tu, laban mayuh pemanah berejista tu,” ku iya ti asal ari Kampung Taee.
Produk P.M.Y Collections ulih dipeda ba Facebook: Priscilla Michael; Instagram: Priscilla Michael Official sereta email pmycollection@ gmail.com.