Tanggungpengawa ketuai komuniti nyadi mata, pending perintah

MIRI: Ketuai komuniti nyengkaum Temenggong, Penghulu, Ketuai Kaum sereta Tuai Rumah ti dichiri baru tauka diambi baru ngembuan tanggungpengawa ti mayuh penguji.

Kaban Kunsil Nengeri ( ADUN) Piasau Datuk Sebastian Ting madah pengawa nyiri tu iya nya pengawa ngelempaika tanggungpengawa ti berat sereta sida tu nyadi mata enggau pending perintah.

“Sida (ketuai komuniti) ti dipilih tu iya nya ke endang dipechaya lalu nyadi mata sereta pending perintah.

“Pia mega, ketuai komuniti patut ninga serebana rayat lalu ngaga ripot ngagai perintah dikena mantu ngangkatka pemansang di genturung pendiau diri empu,” ku iya.

Ting madah munyi nya ba pengawa nyuaka setipikit nyiri enam iku ketuai komuniti ti dipejalai ba Kompleks Islam Miri ditu.

Sama bisi datai iya nya Datuk Bandar Majlis Bandaraya Miri Adam Yii, Residen Miri Sherrina Hussaini, Pemesai Pelilih Miri Abdul Aziz Mohd Yusuf, Temenggong Abdul Rahman Fadzil sereta Temenggong Dato Sri Lee Sie Tong.

Ting mega madahka bala ketuai komuniti ngambika nyadi orang tengah ti ulih nyadung penerang sereta madahka ngagai nembiak redak kelebih agi bekaul polisi enggau visyen perintah.

Enam iku ketuai komuniti ti nerima surat nyiri iya nya Penghulu Samad Alip @ Laip, Kapitab Goh Eng Ban (Piasau), Ketua Kaum (KK) Juih Kariyou @ Mohamad Jaafar Abdullah (Kampung Wireless), KK Usman Suleiman @ Othman Suleiman (Kampung Pujut Tanjung Batu), Kapitan Pui Chiew Thart (Krokop Baru) sereta KK Abdulah Yusop @ Yusuf (Kampung Pujut Sungai Adong).

Semua sida tu iya nya ari DUN Piasau enggau Pujut.

Penghulu Samad beterima kasih ngagai perintah laban udah dichiri baru sereta pechaya ke sida megai tanggungpengawa nya.

“Terima kasih laban udah pechaya ke kami bejalaika tanggungpengawa tu taja pan aku udah beumur 75 taun. Aku besemaya deka naka ulih meri servis ngagai perintah enggau rayat,” ku iya nambah.

Penghulu Samad udah ditambah servis nyentukka 31 Disember 2019 lalu nyadi Penghulu pengelama tujuh taun sereta udah ngemataka sepuluh buah genturung pendiau di Miri enggau Taman Tunku.

Beserimbai enggau nya, iya mega ngarapka perintah deka terus bejalaika mayuh kus dikena nambahka penemu ketuai komuniti kelebih agi dalam bidang teknologi kemaya hari.

Sama besetuju enggau penemu Penghulu Samad, KK Usman madahka kus bansa nya mayuh mantu ketuai komuniti ari sukut nguruska genturung pendiau.

“Kus nya endang diguna dikena nambahka penemu bala ketuai komuniti kelebih agi aku empu ti bedau bisi awak nyereta nya,” ku iya.