Nengah projek tu deka nyungkak pemansang di nengeri lalu nyapai tikas menua mansang manggai ba taun 2030, ku Nancy
SADONG JAYA: Projek Transit Aliran Ringan (LRT) deka nentuka Sarawak nyapai tikas menua mansang manggai ba taun 2030.
Menteri ba Opis Menteri Besai Datuk Seri Nancy Shukri pechaya projek LRT nya deka ngaga ubah ba atur pemansang di nengeri tu kelebih agi di Mengeri Kuching.
Inisiatif Perintah Nenegri nya ku iya ulih ngangkatmanah sistem pengangkut di Sarawak kelimpah ti ulih ngurangka penusah jalai alun ke suah dedat enggau perengka pengangkut.
“LRT nyadi seiti projek Perintah Nengeri, aku meri puji ngagai Kepala Menteri Datuk Patinggi Abang Johari Tun Openg ketegal nyadi nengeri keterubah ari luar Kuala Lumpur ngaga projek LRT.
“Aku berasai gaga ketegal ti ulih meda nengeri kitai nyingkang mansang lalu tu
LRT nyadi seiti projek Perintah Nengeri, aku meri puji ngagai Kepala Menteri Datuk Patinggi Abang Johari Tun Openg ketegal nyadi nengeri keterubah ari luar Kuala Lumpur ngaga projek LRT. Datuk Seri Nancy Shukri Menteri ba Opis Menteri Besai
seiti pekara ti dikemegah kitai semua,’ku iya.
Iya mansutka jaku nya ngagai pemberita pengudah ngulu Program ‘Jalinan Kasih’ Begulai enggau Ketuai di Balai Mayuh Guna Sadong Jaya ditu, kemari.
Nancy ke mega Kaban Parlimen(MP) Batang Sadong bela muji pengeran Abang Johari ba atur ngemujur transfomasyen di nengeri tu.
Ku iya, seiku ketuai meseti ngembuan tenung ke jauh lalu pekara tu bisi ba Kepala Menteri kitai (Abang Johari) ti udah ngenuku mayuh inisiatif ngemansang Sarawak.
“Entara insiatif iya nya Ekonomi Digital, Sarawak Pay sereta mayuh agi lalu aku ngarap mayuh agi projek pemansang ke bukai,’ku iya.
Kemari Abang Johari mantaika tiga batang jalai sistem LRT deka digaga di Kuching ba taun 2019 lalu disadang ngepunka operasyen ba taun 2024.
Tiga batang jalai ke beungkus lebih RM11 bilion iya nya Damai Line, ari Muara Tuang di Samarahan nuju Damai di Santubong.
Kedua, Serian Line berengkah ari pasar Serian nuju Muara Tebas lalu ketiga iya nya Kuching City Line ti deka bejalai meling Mengeri Kuching.