Penyangkai lapan raban ‘Special Allied Team Z’ ke-73 dikerami di Bario
MIRI: Peranak Bario ngintu genap taun ke-73 penyangkai lapan raban ari Unit Khas ari Special Allied Team Z ti diberi nama ‘SEMUT 1’ ti betuaika Tom Harrison kena 25 Mac 1945 di Bario.
Servis memorial rasmi kelima diatur di Bario kena 25 Mac tu tadi lalu udah digulu David Henderson, anak lelaki Tom Henderson ngarika Komando Jack Tredrea ke nyadi siku aja kaban Special Unit Z, bala bakih sida sebilik enggau bujang berani peranak bansa Kelabit, ti bekereja enggau sida.
Pengawa tu udah digulu Kaban Kunsil Nengeri (ADUN) Mulu Datuk Gerawat Gala, Panglima 1 Divisyen General Besai Datuk Stephen Mundaw, presiden Rurum Kelabit Sarawak Dr Philip Raja, Commander 9 Infantry Brigade Brigadier General Dato’ Dzulkafli Mustaffa, bala pemesai ari indu opis Div 1, indu opis 9 Brigade sereta 20 iku kaban ari pengkalan Bario datai ari personel Rejimen Melayu Diraja, bala ketuai komuniti sereta komuniti Kelabit ke bukai.
Komuniti Kelabit udah nya nyuaka Setipikit Basa ngagai David Henderson (ngarika Tredrea) lalu diberi basa ngempu gelar Kelabit, ‘Balang Makat Temurun’ dikena ngenang pemanah pengawa iya, kemerah sereta pemanah pengawa ke alai iya mega dipadu nyadi kaban ba komuniti Kelabit.
Berebak enggau nya, Panglima 1 Divisyen General Besai Datuk Stephen Mundaw mega dipebasa diberi gelar bansa Kelabit ‘Balang Dita’ (Great Hero).
Dalam jaku dipansutka iya, Stephen meri terima kasih ngagai semua ke bisi datai, kelebih agi Gerawat enggau Henderson ti udah datai ngagai Bario.
“Perang iya nya timpuh tasah ke alai mayuh orang bebadi nyawa lalu lenyau pia aja. Sejarah udah ngajar kitai pengelikun ulih datai enggau rega ti tinggi nya kebuah, ukai semina kitai patut ngenang iya, tang mega ngingatka orang ti niri negi sereta bebadi nyawa ungkup nya.
“Enti kitai enda ingat, lebih ari 2,000 iku bujang berani dianjung gawa di baruh operasyen Semut 1, Semut 2, Semut 3 enggau Semut 4 di lembah Bario, Baram enggau Rajang. Tu sejarah pemerinsa sida ngelepaska rayat ari dikeruga pengelikun enggau diperinsa dalam nama pengelikun, pengelantang enggau lepas bibas,” ku iya.
Seraya, Dr Philip madahka Allied Forces sangkai di Bario kelai pekara pemadu beguna ba pengawa ngelepaska diri sereta mega pengepun komuniti progresif di Tanah Tinggi Kelabit.
Ku iya, enda lama pengudah perang, Harrison mulaika diri ngagai Tanah Tinggi Kelabit, ngaga sekula keterubah iya di Pa Main dalam taun 1946 lalu ari nembiak renggat keterubah iya, iya udah mansang numbuhka seraban kelab mit nyadi bujang berani enggau pemungkal pemansang.
“Bala pemungkal tu mulaika diri gawaka komuniti lalu nempa pemansang besai, udah nya gelumbang kedua, ketiga enggau keempat ba pemansang dijapai nengah pelajar.
“Sehari tu, bisi profesor universiti, lutur perubat, sainstis, injinir, luyar, eksekutif korporat enggau artis ari komuniti Kelabit,” ku Dr Philip.
Pengawa sehari nya dipun enggau diau diri pengelama 60 sikin dikena meri basa ngagai sida ti udah bebadi nyawa ngetanka menua rambau Operasi Semut sereta ngitang tambai Malaysia, New Zealand, Australia enggau ‘Op Semut’, bagpipe enggau kalung bungai.