Malaysia, Indonesia bekerejasama nempa nembiak bepengelandik
KUCHING: Malaysia enggau Indonesia bekerejasama nempa nembiak bepengelandik tinggi nitihka peminta guna diatu.
Kerejasama nya dipejalaika pengudah mujur nyadi Sempekat Pemereti Ati (MoU) entara Opis Menteri Pelajar malaysia, Bahagian Pelajar Teknik enggau Vokasyenal (BPTV) ti diarika Kolej Vokasional Matang enggau Politeknik Negeri Pontianak, Kalimantan Barat, Indonesia.
Direktor Kolej Vokasional Matang, Mohammad Sahran Amin madahka, sempekat nya mungkur pengawa bekunsi beberapa pekara enggau tuju dikena mantu perintah nempa pengeraja pengawa bepengelandik enggau profesional dalam bidang pengelandik vokasional.
“Bisi enam pekara ti dipesetuju nyengkaum program betukar nembiak, program betukar pengereja pengawa akademik, program pemansik begulai, program latih pengelantik ti nyengkaum mayuh bengkah bidang, pensijilan pengelandik enggau bidang bukai ti deka dipesejutu ari seiti timpuh ngagai seiti timpuh,” ku iya.
Iya mansutka pekara nya lebuh ngulu pengerami nyain MoU entara Politeknik Negeri Pontianak, Kalimantan Barat, Indonesia di Indonesia apin lama.
Ngenang pekara ti dipesetuju nya, Mohammad Sahran madahka program betukar nembiak reti nya siti pengawa endur mindahka kredit ke alai nembiak ari kededua piak ulih ngulu kursus ti bisi disedia.
Lalu program betukar pengereja pengawa akademik ku iya, tuju program dikena meri peransang ngagai pengereja pengawa kededua piak nya awakka sama bulih penguntung.
“Tiap piak deka nerima pengereja pengawa akademik ari ejensi bukai sereta tusun ti setipak deka digaga bekaul enggau betukar pengereja pengawa akademik sida sekalika dalam bidang ngajar, pemansik tauka aktiviti akademik bukai,’ ku iya.
Kelimpah ari nya program pemansik begulai, ku Mohammad Sahran, kededua-dua piak deka ngiga peluang bekerejasama dalam pemansik.
“Perambu pemansik nya deka ditentu enggau dipesetuju begulai opis ti bekaul enggau kededua piak. Chara kerejasama engka bebida bepelasarka juluk tiap projek,” ku iya.
Lalu ku iya, program latih bepengelandik nyangkaum mayuh bengkah bidang ti dipesetuju kededua piak baka pembuatan, pemesinan, elektrik enggau elektronik, mekanikal, automotif, kimpalan, ‘ventaliting’, ‘heating’ enggau air-conditioning and refrigerating.
Dulu ari nya MoU nya disain Mohammad Sahran enggau Direktor Negeri Pontianak, Muhammad Toasin Asha seraya diperatika ulih Penolong Pengarah Agensi Perindustrian dan Korporat BPTV Kementerian Pendidikan Malaysia, Suraimi Rithwan.