Beribu raban Kristian ngulu servis Good Friday ngingatka pemati Jesus ba regang
MIRI: Gaya hari ti manah di serata Mengeri Besai Miri ngemujurka beribu iku raban Kristian ngulu servis Good Friday dikena ngingatka pemati Tuhan Jesus ba regang.
Servis Good Friday dipejalaika ba sekeda katedral enggau gerija, dalam bemacham jaku ketebal agi diatur muak ke lemai ti mega sebagi ari ‘Easter Triduum’, ke berengkah enggau sembiang ba Hari Empat lalu tembu kena Hari Minggu dikena ngelaika Jesus angkat idup baru.
Dulu ari servis nya, bala ketuai gerija nyengkaum Bishop Richard Ng ba Gerija Roman Katolik Kandang Miri, Right Reverend Solomon Cheong, Sapit Bishop Anglika kandang Kuching (Sarawak enggau Brunei) sereta Vicar of St Columba’s Parish enggau Rev Simon Ting, Superintenden Gerija Methodist Pelilih Miri (Bagi Miri enggau Limbang Divisions) ke dibantu Rev Wong Lik Kai.
Ng ke mega Chairman Gerempung Gerija Pelilih Miri lebuh ke bejaku, ngelalau raban Kristian nyengkaum Katolik beratka Good Friday enggau regang.
“Maya Jesus kelia, regang nya endang suah dikena ngemedis sereta digalauka ngagai pemati orang ti ngereja penyalah berat. Orang ti ngeregang nya deka ngemalu lalu meri pemedis ti belelubah nyentuk ke jalai pemati.
Jesus enda salah lalu Pilatus tiga kali madahka iya enda salah lalu dulu ari nya nyalahka diri ketegal nyadi pemati ti ngenyinuka ba atas regang,” ku iya.
Nya kebuah ku iya, regang nyadi puak sereta lambang raban Kristian di serata dunya ti udah dikena ngeregang Jesus ti nyelamatka nyawa mensia. Kelimpah nyadi kereban dikena ngemedis sereta munuh, regang mega nyadi kereban dikena nyelamat lalu nyadi simbol Kristian ” ku Ng.
Iya mega besampi ngambika mensia majak pechayaka iring Tuhan ti deka meri pengering enggau pengeliat ati ngambika ulih ngesan regang kediri.
Cheong mega ngelalau raban Kristian ke alai Good Friday nya maya meresa runding ti mega siti ari asai ati, pikir enggau motif.
Wong nengah awak nya meransang raban Kristian ngambika seruran pechayaka sereta ngemeranka jalai pengarap sida ninting hari ke pemaik sida empu enggau menua “Jesus mai kitai nuju pengamat enggau berekat. Berekat nya pemeri ngagai kitai.Iring ke betul ngambika kitai ngelala dosa, nemu bida ke amat enggau ke salah,” ku iya. KUCHING: Pemendar sereta pengeran Suruhanjaya Syarikat Malaysia (SSM) ke deka meri penyedar, peransang sereta ngerembaika produk orang dagang mit nengah Karnival Online Entreprenuers (ONE), udah mujur.
Pekara nya dituku sereta dipadahka Maria Pandi ti ngepun sereta ngempu Maria persona Beautry Herbs enggau Siti Zaleha Mohd ti ngempu CT Manja Herbs.
Maria ti ngasilka urung enam bengkah produk ngena kayu manis bepenemu karnival ke diatur di serata menua endang udah mantu iya ngemaju sereta ngerembaika dagang iya dalam timpuh 10 taun ke udah.
Taja pia Maria enda ngenggaika teknologi baru diatu baka bedagang ngena ‘online’ mega bisi mantu iya ngerembaika produk ngagai menua ari nengeri tu.
“Karnival ke baka tu amat manah sereta meri peluang ngagai orang dagang baka kami meri kelala produk ngagai mensia mayuh.
“Tu peluang ungkup orang dagang nengeri tu ngambika enda tinggal ari orang dagang di menua Semenanjung Malaysia.
“Ba penemu aku empu ngelakuka dagang ngena chara online endang manah tang aku lebih deka agi ngelakuka produk baka nengah karnival ke baka tu taja pan aku mayar kediri empu, laban ari tu aku ulih terus betunga mua enggau orang ke deka nguji tauka meli produk. Sida mega ulih terus ngujika produk,” ku iya.
Lebuh dikerandau Utusan Borneo ba Karnival ONE SSM ke diatur ba CityOne Megamall, Maria nyeritaka iya berengkah ba taun 2010 ke alai iya semina ngasilka siti produk aja iya nya Minyak Resdung Kayu Manis lalu nyentuk ke diatu iya mujur ngasilka enam produk ngena kayu manis.
“Enda lama agi aku deka ngasilka tea enggau jus kayu manis,” ku iya ti ngasilka enam produk ari kayu manis baka sabun, syampu, minyak wangi enggau ke bukai ti dikemendarka Opis Menteri Pengerai Malaysia (KKM).
Diatu produk Maria Persona Beuty Herbs udah ngerembus makit Brunei, Singapura sereta Semenanjung Malaysia nengah ejen ke udah dipilih iya.
Kelimpah ari nya, Siti Zaleha Mohd, 42, ke asal ari Melaka ti udah bisi peneleba 14 taun bedagangka produk orang bukai mega, deka agi nyereta karnival tauka ekspo dibandingka enggau ngelakuka produk ngena chara online.
Zaleha berengkah ngasil sereta nyual produk diri empu ari taun 2017, iya nya produk ti ngena daun bidara. Entara 13 produk iya empu ke diasilka dalam timpuh setaun setengah baka pati aura bidara, balm bidara, bidara resdung, perfume apple blossom enggau bidara, balm bidara limau purut enggau ke bukai.
“Aku bisi ngelakuka produk nengah online baka Facebook enggau Instagram.
“Tang aku deka agi nyereta karnival tauka ekspo laban aku ulih terus betemu enggau sida ke deka meli produk aku. Enti online sida engka enda ulih ngasaika terus produk aku,” ku iya ti siku ari orang dagang ti nyereta bansal pemansang Karnival ONE SSM, 30 Mac - 1 April 2018.