Tu sebengkah inisiatif Malaysia Airport dikena ngemuntang mensia mayuh ke nguna servis di KIA
KUCHING: Aplikasyen e-wallet vcash diatu ulih dikena di Palan Penerebai Bilun Antarabangsa Kuching (KIA) pengudah dilanchar Kepala Menteri Datuk Patinggi Abang Johari Tun Openg kemari.
Atur transasyen enda begunaka duit nya nyadi sebengkah inisiatif Malaysia Airport dikena ngemuntang mensia mayuh ke nguna servis di KIA.
Bejaku ba pengawa nya, Abang Johari madah Perintah Nengeri nyukung insiatif ke diadu Malaysia Airport.
“Insiatif Malaysia Airport tu seraris enggau pengeran perintah ti deka ngadu ubah ba nengeri tu nuju ekonomi digital.
“Perintah meri sukung ngagai inisiatif tu ti deka ngemuntang mensia mayuh ke nguna servis Malaysia Airport,”ku iya.
Ba pengawa ke sama, Abang Johari madah bisi merambu ngagai Malaysia Airport ngambi ngadu kerejasama enggau Perintah Nengeri ba atur ngangkatmanah KIA ungkup pemaik semua.
“Ungkup tuju nya kitai udah numbuhka seiti komiti betuaika Sapit Kepala Menteri Tan Sri James Masing ke deka nusun semua perambu.
“Kitai dekaka KIA nyapai stindid antarabangsa tauka seikas enggau Palan Penerbai Bilun Antarabangsa Kuala Lumpur(KLIA),” tandu iya.
Dulu agi ari nya, Direktor Malaysia Airports Datuk Badlisham Ghazali madah KIA nyadi palan keterubah di Malaysia nguna atur mayar chara digital.
Vcash sebengkah aplikasyen bayar telefon pintar ke nyendia chara mayar ke mudah ungkup rayat Malaysia.
Sentang kaul ke sama, Digi Telecommunication Sdn Bhd (Digi) deka ngadu kerejasama enggau Malaysia Airports ngambi ulih ngemujur inisiatif nya lalu nyikap KIA enggau sambung WIFI bepeneras tinggi.
Aplikasyen Vcash ulih diambi enggau enda bebayar ari Google Play Store tauka Apple App Store.
Bela datai Sapit Kepala Menteri Tan Sri James Masing, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah enggau Menteri ba Opis Kepala Menteri Datuk Talib Zulpilip.