Sarawak mujur nyadi nengeri pemadu mimit kes residivis
KUCHING: Program mulaika pemanah ulah enggau pemansang orang ke nguan Palan Jil Nengeri Sarawak udah mujur netapka Sarawak nyadi nengeri ke pemadu mimit kes residivis tauka ngapil kes ke sama ungkup timpuh bulan Februari 2015 nyentuk ngagai Februari 2018.
Ketuai Direktor Palan Jil Malaysia Dato’ Sri Zulkifli Omar madah pemujur nya asil pengeransing enggau tanggungpengawa ke digaga semua staf jil di nengeri tu.
Bepelasarka statistik ari bagi Media Palan Jil, Sarawak semina ngerikut 49 kes residivis ari penyampau 10,342 iya nya 0.47 peratus dalam timpuh bulan Februari 2015 nyentuk ngagai Februari 2018.
“Pugu pemujur mulaika pemanah ulah di luar jil bepanggai ba program ke disedia dalam jil.
“Aku berasai temegah enggau pengeransing enggau tanggungpengawa ke digaga semua staf jil di nengeri tu ba atur nentuka program mulaika pemanah ulah ulih ngurangka kes residivis ba ikas ke baruh enti dibandingka enggau nengeri bukai,’ku iya.
Iya mansutka jaku nya ba pengerami ngintu Hari Palan Jil Ke-228 ke mega nyadi pengawa nyuaka Anugerah Perkhidmatan Cemerlang(APC) ke diatur di Auditorium Sri Sarawak, Opis Direktor Palan Jil Sarawak ditu, kemari.
Ngenang kaul bukai, Zulkifli madah naka 28 Mac 2018, penyampau 1,062 orang jil udah nembuka program Orang Di Parol (ODP) lalu 52 iku ke bukai benung nempuh program.
“Ba taun ke udah, ‘Corporate Smart Internship for Parolee’ tauka CSI Parol udah digaga ke alai latih eng- gau awak gaga disedia ngagai ODP.
“Program tu mandangka pemaik ke alai 565 ODP udah nitihka CSI di 12 palan ke dipilih nengah kerejasama kompeni GLC enggau pribit.
“Pekara tu bela diuji Palan Jil Nengeri Sarawak kenyau taun 2015 ke alai 50 iku ODP mujur nempuh CSI di Kompeni Farley, Bintulu Sarawak,” ku iya.
Iya madah pengawa nyain Prosedur Operasi Standard (SOP) CSI entara Kompeni Farley ba bulan Mac ke udah matak 18 ODP gawa ba komnpeni nya.
Ku iya pemujur nya meri pengarap ngagai Opis Jil nyapai tagit enda kurang 300 ODP deka nempuh program CSI taun tu.
“Aku meransang raban pengaji di nengeri tu bela ngesan tanggungpengawa nyaup orang jil lalu nyendia awak gawa ngagai sida,” ku iya.