Sarawak bisi penemu ngembuan jalai ungkup kena ngangkatka industri kreatif ke dikena mantaika pemayuh pengawa seni sereta adat pesaka rayat di nengeri tu
KUCHING: Perintah Nengeri deka ngemansangka industri kreatif kena ngangkatka pemansang pengawa seni sereta adat pesaka Sarawak ba mata dunya.
Kepala Menteri Datuk Patinggi Abang Johari Tun Openg madah, ketegal nya Sarawak bisi penemu ngembuan jalai ungkup kena ngangkatka industri kreatif tu ke dikena mantaika pemayuh pengawa seni sereta adat pesaka rayat di menua tu.
“Siti pekara ke deka dipadah aku, iya nya kitai sigi bisi atur kena ngemansangka industri kreatif tang aku bedau ulih madah diatu, nganti bulan September tu ila, baru aku madah, laban tu pekara ke manah endar ke Sarawak,” ku iya.
Iya madah munyi nya lebuh bejaku ba atur pengawa ‘Persembahan Khas Kelab Peminat P.Ramlee Sarawak’ ke ngena jaku rambai ‘Menyusuri Jalan Kenangan’ di Komplek Kunsil Nengeri Lama ditu, malam kemari.
“Kitai bisi chara ke endang diungkup kena ngangkatka industri kreatif tu ila, kitai ulih mantaika pengeraja pengawa seni lama kitai di Sarawak,” ku Abang Johari.
Iya nandu baru madahka nengah jalai tu mega, komuniti dunya ulih meda penyelai adat pesaka lama, pengawa seni sereta adat pesaka rayat Sarawak.
“Nengah siti jalai tu ila, aku ngasaika iya ukai semina ulih mai kitai beratika pekara tu enggau silik agi tang iya mega ulih dikemansangka ngagai endur bukai,” ku iya.
Lebuh bejaku pasal resolusi kongres seni Sarawak ti diserah ulih Direktor Dewan Bahasa enggau Pustaka, Dr Hazami Jahari, Abang Johari madah, ari sepiak konsultan ngaga projek pemansang Palan Seni Persembahan Negeri, sigi udah dipadu.
Iya madah, sepiak konsultan benung ngaga ukir gaya rumah seni nya.
“Bekait enggau resolusi kongres ke nyadang pengawa ngaga panggung seni dikejampatka, diatu konsultan nya udah dipadu lalu sida iya benung merambu ngaga ukir gaya rumah panggung seni menua.
“Sigi udah bisi dalam perambu kami, ngena Komplek DUN Lama, ke deka ditambah mimit, nyambung ari DUN Lama, alai panggung khas digaga lalu disedia enggau perengka guna beteknologi sereta internet, pekara tu dalam perambu kami,” ku iya.
Ba jaku iya mega, Abang Johari ti mega nyadi Menteri Pemansang Mengeri enggau Rampa Menua madah, Perintah menua mega merambu deka ngemanahka agi palan latih pengawa seni ke udah bisi diatu.
Ku iya, palan nya digaga nyadi endur ngelatih rebak baru belajar pasal penemu seni enggau silik agi, lalu ulih mantaika seni adat pesaka rayat Sarawak ngagai serata dunya.
“Lalu ke penudi iya endar, kami ari sepiak Perintah deka mansik lalu ngaga pemutus bekait enggau resolusi ti diberi ngagai kami, ngambika kitai ulih sama negapka pemisi pengawa seni kitai di Sarawak,” ku iya.
Sama bisi enggau ngulu atur pengawa nya malam kemari, bini Kepala Menteri, Datin
Siti pekara ke deka dipadah aku, iya nya kitai sigi bisi atur kena ngemansangka industri kreatif tang aku bedau ulih madah diatu, nganti bulan September tu ila, baru aku madah, laban tu pekara ke manah endar ke Sarawak. Datuk Patinggi Abang Johari Tun Openg Kepala Menteri Sarawak
Patinggi Dato Juma’ani Tuanku Bujang, Sapit Kepala Menteri Tan Sri James Jemut Masing, Speaker DUN Datuk Amar Mohamad Asfia Awang Nassar enggau Menteri Pengawa Dagang, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah enggau bini iya, Datin Zuraini Abdul Jabar.