Tukar nama ‘Sekolah Rendah’ ngambika ngipak pemerat STEM
KUCHING: Tukar nama ‘Sekolah Rendah’ ngambika ngipak pemerat sabjek Sains, Teknologi, Kejuteraan enggau Matematik (STEM) ba entara nembiak sekula ke berumur 7 ngagai 12 taun.
Menteri Pelajar, Sains enggau Pansik Teknologi, Dato Sri Michael Manyin Jawong madah ngena leka jaku ‘rendah’ tau ngasuh orang saru runding lalu ngasaika pelajar sereta ngajar di sekula primeri enda berat.
“Sebedau nya, sistem pelajar enda betatika pengerindu ba pelajar ke bekait enggau STEM lalu nembiak pan enda diajar enggau betul lalu tau ngasuh pengerindu sida iya majak surut.
“Sekula primeri kitai pan mayuh pengurang perengka guna, ungkup enda chukup.... dibanding enggau japai STEM bepanggai ba pemungkal pemansang pelajar.
“Perundingka pengajar ke nadai penau tang dipajakka ngajar, baka pengajar ke ngajar Jaku English tang dipajak ngajar sains, lalu pengajar ke ngajar Bahasa Malaysia dipajak ngajar Matematik kelebih agi baka di sekula kurang nembiak (SKM),” ku iya madah ba atur pengawa ‘National Science Week 2018’ di Pustaka Negeri Sarawak, kemari.
Manyin nyadang leka jaku ‘Sekolah Rendah’ di tukar ngagai Sekula Primary tauka Sekula Utama tauka Sekula Dasar, ngambika timpuh lima taun pengerindu anak mit ba kededua sabjek nya, majak nambah.
Manyin madah enti di seme- nanjung, ketegal nama bansa nya enda dikemendarka, tang di Sarawak ulih dikena laban ngarapka pengawa nya nyapai tagit STEM dalam timpuh kurang ari lima taun.
Dalam timpuh nya mega, iya minta ngambika bala nembiak sekula sereta apai indai ngubah penemu sida ke seruran berunding, iya nya Sains siti sabjek ke pedis, lalu iya ukai ke nembiak sekula Bumiputera tauka pelajar di menua pesisir.
Di menua Singapore ku iya, urung 85 persin nembiak sekula primeri ulih nguasa pekara bekait enggau STEM, ku iya.
Kelimpah ari nya, iya mega ngelalau madahka, Jaku English enda ulih dikeenggaika, enti deka nguasa STEM kelebih agi ke Revo- lusi Industri 4.0 laban mayuh bup, jurnal ditulis ngena Jaku English.
Iya nandu baru madahka, kemaya hari tu, urung 300,000 graduet nadai pengawa pengudah sida iya nembuka pelajar sida di IPTA di serata menua laban enda ulih nguasa Jaku English enggau STEM.
“Perintah Menua udah nganjung sadang ngagai MOSTI, ngasuh sida iya muka sebuah Palan Sains di Dewan Suarah Kuching sebaka enggau di Kuala Lumpur, lalu enti sema sadang tu dikemendarka, nyangka dalam kandang dua ngagai tiga taun baru iya ulih digaga,” ku iya.
Sama bisi enggau ngulu atur pengawa nya kemari, Sapit Sekretari Besai STI, MOSTI Profesor Madya Dr. Ramzah Dambul.