Gelar KJA taun tu deka digaga di Sibu

SIBU: Gelar Kenyalang Journalism Award ( KJA) ke taun tu deka digaga di Sibu, pengudah idar Miri, taun siti nyin tadi.

Ba aum besai Serakup Gerempung Pengarang Berita Sarawak (FSJA) ti digaga kena minggu siti nyin tadi, Jane Moh ari Palan Institut Pengarang Berita Rejang (IRJ) dipilih nyadi presiden baru FSJA nganti Andy Jong ari Gerempung Pengarang Berita Utara Sarawak (NSJA).

Ba taun 2017, KJA digaga di Miri, ke betuaika Jong ti mega nyadi chairman pengatur KJA idar Miri.

FSJA ngembuan timpuh mangku pengawa komiti sereta eksco dalam timpuh setaun aja, ke dipangku ulih gerempung pengarang berita di serata menua Sarawak nitihka idar sida iya.

Sebedau Miri, Kuching mega kala ngatur KJA ke betuaika Gerempung Pengarang Berita Pelilih Menua Kuching (KDJA) dalam taun 2015 enggau 2016. Nangkan IRJ dalam timpuh setaun tu ila, gelar KJA deka pulai baru ngagai KDJA dalam taun 2019.

Gelar KJA entara gelar ke pengabis nyulut ke raban pengarang berita di serata menua Sarawak, alai tiap berita tauka visual ke digaga sida iya dalam timpuh setaun ke udah ulih enggau bepekit KJA, ke nyendiaka perais ke besai.

Raban spunsa bukai ke KJA datai ari korporat besai baka Shell, Petronas, Sarawak Energy Berhad (SEB) enggau Perintah Menua Sarawak.

Naka kediatu, penerang ke silik agi bekait enggau pekit tu deka dipansutka dalam kandang sebulan tu ila.

Ba AGM FSJA hari Lima minggu nyin tadi, kelimpah ari Moh dipadu nyadi presiden FSJA 2018, mandal presiden, Watt Zacheaus (Gerempung Pengarang Berita Sibu tauka SJA), mandal presiden kedua, Jacqueline David (KDJA), Sekretari, Yeo Choo Eng (IRJ), Penulung Sekretari, Florence Genta (SJA), Tukang Wang, Chia Shu Kiong (IRJ), enggau Penulung Tukang Wang, Yii Souk Ming (SJA).

Raban komiti bukai ke dipadu iya nya, Andy Jong (NSJA), Liew Li Mui (NSJA), Theng Joo Hua (NSJA), Rudi Affendi (KDJA), Anasarhia Jenis (KDJA), Tiong Tak Liong (IRJ), Ho Toh Kai ( IRJ) enggau Earl Anek (SJA).