Pengawa nya deka dikemujur nengah kerejasama Perintah Nengeri enggau Malaysia Airports Holdings Berhad
KUCHING: Perengka guna ba 13 palan penerebai bilun di nengeri tu deka diangkatmanah, ku Kepala Menteri Datuk Patinggi Abang Johari Tun Openg.
Ku iya, pengawa nya deka dikemujur nengah kerejasama Perintah Nengeri enggau Malaysia Airports Holdings Berhad (MAHB).
“Ungkup pengawa nya perintah deka numbuhka siti komiti khas betuaika Sapit Kepala Menteri ke mega Menteri Perengka Guna enggau Pengangkut Tan Sri James Masing.
“MAHB keran deka nambah perengka guna di Palan Penerebai Bilun Antarabangsa Kuching (KIA) lalu aku merambu numbuhka siti komiti khas ti deka beratika semua pekara ba atur kitai ngemansang terminal Kuching nyadi terminal ke moden,” ku iya.
Iya mansutka jaku nya ba aum pengarang berita pengudah bejadi e-wallet vcash di KIA ditu, kemari.
Abang Johari nambah, enti palan penerbai bilun kitai enda nyapai stindit ke ditetap, udah tentu orang numpang bilun deka nyalahka perintah lalu ketegal nya input chukup berat.
“Kada ka kita bisi ngasai diak terminal kitai sempit ke alai jemah ila udah tentu deka dedat ketegal mayuh orang deka nepan bilun,’ku iya.
Ketegal nya ku iya, kerejasama tu dilempaika ngagai Tan Sri Masing enggau Chairman MAHB Tan Sri Dato Seri Syed Anwar Jamalullail.
Masing deka disaup Menteri Dagang Temuai, Seni, Main Asal, Nembiak enggau Lumba Datuk Abdul Karim Rah- man Hamzah sereta Datuk Talib Zulpilip ke nyadi Duta MAHB.
Ngenang kaul ke sama, Direktor MAHB Datuk Badlisham Ghazali madah MAHB enggau Perintah Nengeri deka ngagihka RM28.9 juta taun tu ungkup pengawa ngangkatmanah palan penerbai bilun di nengeri tu.
Ku iya 13 palan penerbai bilun di Sarawak deka napi trasfomasyen ba taun tu ke alai perengka guna deka ditambah, nyengkaum nambah endur ngengkah entuka sereta ke bukai.
“Kereja ngangkatmanah deka diadu sepemanjai taun tu lalu ba KIA kereja deka berengkah ba bulan tu,’ku iya.
Semua 13 palan penerbai bilun di Sarawak iya nya KIA, palan penerbai bilun di Miri, Sibu, Bintulu, Mukah, Mulu, Lawas, Marudi, Long Banga, Tanjung Manis, Bario enggau di Lutong.
MAHB keran deka nambah perengka guna di Palan Penerebai Bilun Antarabangsa Kuching (KIA) lalu aku merambu numbuhka siti komiti khas ti deka beratika semua pekara ba atur kitai ngemansang terminal Kuching nyadi terminal ke moden. Datuk Patinggi Abang Johari Tun Openg Kepala Menteri Sarawak