PBDS Baru ngengaika tuduh dikumbai mechahka undi

KUCHING: PBDS Baru ngenggaika tuduh ke alai iya nyadi kereban politik Barisan Nasional ( BN) mechahka undi maya pengawa bepilih.

Presiden iya, Cobbold John Lusoi madah tuduh pemadu baru ke alai PBDS Baru nyadi bakih-BN semina berita dikerembai raban ti mekit sida lalu patut diketu.

Iya mega madahka PBDS Baru ukai kaling BN lalu ukai sebagi ari Pakatan Harapan (PH) tauka Gabungan Rakyat Saksama (Saksama).

Iya nyemetak madahka semina siti aja kaul strategik PBDS Baru ungkup Pengawa Bepilih Besai Ke-14 (PRU14) iya nya enggau Sabah Parti Solidariti Tanah Airku ( STAR) di baruh United Borneo Alliance (UBA).

“Aku deka madah nyemetak. Kami ukai dalam Saksama, BN tauka PH. Ketuka pekara kaling BN pasal kami. UBA iya nya pengawa negika rayat Sarawak kelebih agi ba safeguard Sarawak,” ku Cobbold kemari.

Iya mega madahka bansa Dayak di Sarawak patut netapka pengidup sida empu lalu anang kelalu bepanggai ba komuniti bukai tauka perintah.

Parti STAR ari Sabah diketuai Datuk Dr Jeffey Kitingan ke dulu suba diberi nama STAR Sabah. Taja pia, parti politik agi ngetanka akronim ‘STAR’.

Kena 29 Januari, PBDSB enggau STAR Sabah udah nyain Sempekat Pemereti Ati (MoU) ungkup kaul strategik di Penampang, Sabah.

Seraya Ketuai Nembiak PBDS Baru Rapelson Richard Hamit mega nyemetak madahka parti nya nadai kala ngaul diri enggau sebarang gempung politik sekalika BN, PH tauka Saksama.

Iya ngenggaika repot dalam Jaku China ke alai genteran jaku Sekretari Besai State Reform Party Sarawak (mega akronim STAR) Simon Tiong madahka PBDS Baru sebagi ari Saksama.

Iya madahka PBDS Baru diatu diperatika mayuh nyadi pelasar politik ungkup bansa Dayak lalu ungkup komuniti ti nentuka kuing politik enggau nadai bepanggai ba kuasa politik bukai dipegai komuniti bukai.

“Kami milih enda nyemilik sebarang gempung politik dikena nyeliahka takdir ke sama baka kala ditapi SNAP enggau PBDS suba. Kami nadai kala numbuhka parti baru, tang kami ngidupka parti kami, ke alai PBDS (udah dikinsil dalam taun 2004),” ku Rapelson.

Kami mega pechaya ‘PBDS Baru iya nya penerang kaling- BN’ udah bepun ari penerang digaga presiden protem parti, Louis Jarau, apin lama pengudah rejista iya dikemendar Pengerejister Gerempung ( ROS) dalam gtaun 2013.

Ku iya, taja Louis udah nerangka penerang nya ari pekara nyata PBDS nadai kala ditingkil ari BN sebedau iya dikinsil, penetap parti nyadi penyakal di menua tu udah dibantai ba mua mayuh dalam taun 2016.

“Taja pia, penerang nya nyadi kereban propaganda politik ari BN enggau PH dikena ngamahka nama parti belalauka bansa Dayak,” ku iya.

Ku iya nambah, pemisi PBDS ukai semina negika hak bansa Dayak tang mega ngetanka hak Sarawak di baruh Sempekat Malaysia 1963 (MA63) ti udah lenyau.