Orang Ulu meseti positif dalam pengidup ungkup pemansang komuniti
MIRI: Komuniti Orang Ulu meseti terus beserakup lalu seruran positif ba pengidup ngambika maju seriris enggau pekara ke nyadi di nengeri enggau menua tauka di dunya.
Mansutka jaku tu, Kaban Kunsil Nengeri ( ADUN) Telang Usan Dennis Ngau madahka pengawa numbuhka Gerempung Serakup Orang Ulu Sarawak Malaysia (FORUM) endang patut ba jam iya sereta tuju nyadi payung ngempung kesemua semilan etnik besai Orang Ulu belalauka serakup datai bansa Kayan, Kenyah, Bisaya, Kelabit, Penan, Lun Bawang, Lakiput, Berawan enggau Saban.
“Kenyau ari Forum ditumbuh 10 taun ke udah, iya udah gawa rat begulai enggau perintah ngemai perati perintah ba peminta enggau isu ti mangka komuniti ngagai perintah di renggat nengeri enggau besai. Tu kelimpah ari batang tuju bukai gerempung,” ku Dennis.
Nitih ku Dennis, sebedauh Forum ditumbuh, etnik be- bida ari komuniti Orang Ulu ‘ tenggelam’ antara komuniti besai di nengeri enggau menua tu.
“Pemisi Forum ti gawa rat begulai enggau perintah ke bisi diatu, kitai enda ibuh bejaku tauka mantaika peminta ngambika diperati perintah tang ari kaul rat enggau sida dalam raban bekuasa kededua ketuai perintah nengeri enggau perintah besai, pinta kami dipending,” ku Dennis dalam jaku bejadi nutup Aum Besai Dua Taun Sekali (BGM) Forum 2018 di sebengkah hotel ditu, apin lama ke udah.
Dennis mega ngingatka komuniti Orang Ulu nitihka strategi pemansang dipejalaika Kepala Menteri Datuk Patinggi Abang Johari Tun Openg ungkup nengeri tu, sereta mega pemansang di menua tu di baruh pegai Menteri Besai Datuk Seri Najib Tun Razak sereta perintah besai.
“Menua bisi nyedia peluang besai ngagai semua orang ngambika direbut tang semina sida ti seruran positif deka teulihka penguntung ari iya.
“Nya kebuah, beguna endar komuniti mit baka Orang Ulu, urung 300 ribu iku aja, ulih bebakih enggau perintah sereta komuniti ti mujur kemaya hari,” ku iya madah nyemetak.
Berebak enggau nya, Dennis meri tabi puji ngagai Presiden Forum, Antonio Kahti Galis sereta kesemua kaban komiti ke baru dipilih seraya nangkan sida nyengkaum iya empu, ke alai komuniti Orang Ulu di nengeri enggau menua tu mega ngelempaika pengandal enggau juluk komuniti ba sida.
“Nya kebuah, Forum nadai pilih bukai tang terus gawa bebendar agi ngangkatka status komuniti Orang Ulu sekalika ba ekonomi, rama, kereja dalam sektor perintah serera sektor bukai,” ku Dennis.
Dennis udah nya nyamin bala komuniti ke alai bala kaban komiti enggau ketuai dipilih ngetuaika Forum ukai orang ‘Yes Men’ aja baka ti disebut sekeda orang tang deka seruran mantaika isu bekaul enggau komuniti, taja pia, tebal agi milih gawa nengah randau.
Ngelansa pasal tanah ti diagihka perintah nengeri ngagai gerempung ti betungga enggau Eastwood Valley Golf and Country Club ditu, Dennis ngansak Forum gawaka iya.
“Aku pechaya Kepala Menterin Datuk Patinggi Abang Johari Tun Openg bisi pengandal tinggi ngambika nyadi lalau komuniti, nya kebuah iya meri sebidang tanah ungkup ngentak begunan Forum lalu begunan bekaul bukai nyadika palan komuniti sereta mega pematak temuai.
“Nya alai, kitai meseti berengkah ngemansangka tanah enggau naka penyampat,” ku Dennis.
Beserimbai enggau BGM, kesemua pangku pengawa tetinggi dipilih baru enggau nadai diperebut, Antonio nyadi presiden enggau Ipoi Datan nyadi sapit presiden ti ngetuai gerempung ungkup penggal 2018-2019, seraya pangku pengawa mandal presiden pulai ngagai Den- nis, ADUN Murum Kennedy Chukpai Ugon, Presiden Rurum Kelabit Sarawak Dr Philip Raja, Presiden Serakup Berawan Sarawak Datin Catherine Awing Wan enggau Serina Datuk Hasan Sui.
Dick Bala enggau Romulus Charles Agan udah dipadu nyadi Sekretari Besai enggau Penulung Sekretari Besai seraya Daniel Jok Wan enggau Dionysius Richard Ellai dipadu nyadi tukang wang enggau penulung tukang wang.
Pangku pengawa pemesai pemadah enggau penulung pemesai pemadah dipenggi Annia Selalang Lawai enggau Laing Uvang.
Lapan iku kaban udah dipilih nyadi kaban komuniti. Sida tu iya nya Usat Bilong, Cr Robert Ayu, Leonard Douglas Lucas, Peter Sawal, Michael Ngagu Sabang, Philip Ngo, Dominic Lusat Sagan enggau Johnny Yahya Suut.
Lebih ari 80 iku raban deligit enggau kaban ari semilan serakup rejista di baruh Forum bisi datai ngulu BGM nya.