BR1M ukai ‘gimik’ politik nyerumba PRU14 ti deka datai
SIBU: Menteri Dagang Antarabansa enggau EDagang Dato Sri Wong Soon Koh madahka Baucher Rayat 1Malaysia ( BR1M) ukai semina ‘gimik’ politik nyerumba Pengawa Bepilih Besai Ke-14 (PRU14) ti deka datai.
Wong ke mega Menteri Wang II madah, tu nadai kait enggau PRU14 ti deka datai.
“Tu ukai ‘gimik’ (pengawa meri BR1M) pengawa bepilih ungkup sitak parlimen ti nyauka digaga, laban batang tuju ke bendar kitai meri BR1M diatu iya nya endang nadai kait enggau pengawa bepilih,” ku iya bejaku maya Pengerami Nyuaka BR1M Pelilih Sibu Taun 2018 ba Dewan Suarah, lemai kemari.
Ba pengerami nya, iya udah nyuaka BR1M ngagai 129 iku penerima ungkup sitak Kunsil Nengeri (DUN) Bawang Assan.
Kaban Kunsil Nengeri (ADUN) Bawang Assan nya mega madahka pengawa meri BR1M ungkup taun ke- 7 nya udah ngayanka penyiru perintah ti endang ngemeratka pengelantang pendiau rayat di nengeri tu.
Ku iya, bantu tu ulih nyaup ngelempungka tating penusah rayat kelebih agi ti bepenatai pemisi mit lalu ulih ngelempungka ungkus pengidup rayat maya tu.
“Ba Perintah Nengeri Sarawak, kami endang beterima kasih ke pengawa Perintah Besai ti bebendar deka meri bantu BR1M ungkup pengelantang rayat,” ku iya.
Kelimpah ari nya, iya mega ngansak bala penerima BR1M nengah baucher ngambika muka akaun bank ngambika bantu BR1M ulih terus dipasuk ke dalam akaun sida.
Ku iya madah, ba taun 2013 aja perintah udah ngagihka baucher ngagai 63, 050 iku penerima di pelilih Sibu.
Taja pia, ba taun 2014, iya madah perintah Barisan Nasional (BN) udah ngaga pengawa ngagih BR1M nengah akaun peribadi sida ti nerima lalu tu udah meri pangka ti nyata ngagai penyampau penerima BR1M ngena baucher.
“Sida ti nerima baucher iya nya semina 4,744 iku ba taun 2017 ari 60,050 iku ba taun 2013. Chara tu ulih ngelimatka jam perintah lalu mega jam sida ti nerima BR1M ari ti bebaris nganti lama.
“Penyampau sida ti nyau nurun tu mandangka bala penerima BR1M ngembuan pechaya ngagai perintah BN masukka BR1M ngagai akaun sida,” ku iya.
Sama bisi datai iya nya Pemesai Pelilih Sibu Awang Yusup Awang Mostapha.