Penyampau orang gian dadah nambah di serata dunya

SIBU: Pemayuh orang ti gian dadah niki di serata menua lalu tu pekara chukup ngenusahka ati, pia ku Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah.

Malaysian Crime Prevention Foundation (MCPF) madah penyampau gian dadah di serata menua udah niki ari 18 peratus dalam taun 2017 dibida enggau taun sebedau nya.

Mandal Chairman Kanan MCPF, Tan Sri Lee Lam Thye dipadah bisi nyebut pekara tu lebuh bejaku ngagai pengarang berita pengudah ngulu program Sunday Family Ride di Kota Kinabalu kena Hari Minggu.

Ba pekara tu, Abdul Karim, ke mega Chairman Gerempung Nagang Dadah Malaysia (Pemadam) Sarawak, madahka perintah enggau kelebih agi sida ti dilempaika tanggungpengawa mutarka isu tu meseti bejalaika sekeda pansik ari ati ba dini pengilap kitai.

“Sekalika kitai ejensi penerit adat enda sikar mutarka penanggul tu? Sekalika bisi kohort enggau penyalah tu? Nama kebuah menua bukai baka Korea Selatan, Jepun, Taiwan, Hong Kong, Singapore, Australia, New Zealand enda betapi enggau penanggul ke sama baka ti ditapi kitai?

“Sida mega bisi populasyen nembiak ti besai. Sekalika kitai mega kelalu puas ati ba pengawa kitai munaska dadah? Kitai ngarapka perintah enggau ejensi dikeandal ngemunaska penyalah dadah enggau nyual dadah diperati enggau serius sereta komited ba pengawa sida.”

Seraya Lee mega nyemetak madahka penyampau tubuh gian dadah manggai 25,992, ke alai 18,440 ke baru gian.

Iya udah nya madahka semua penyampau tubuh sida lelaki gian dadah manggai 24,926, seraya 996 iku indu ti gian dadah.