Anang ngena teknologi pemadah nabur berita pelesu, ku Linda
KUCHING: Mensia mayuh dilalau enda bekenaka teknologi pemadah (IT) ungkup pekara ti salah, baka naburka penerang ti enda betul, bejaika perintah sereta ngayanka gambar ti enda menyana ke ulih mai pangka negatif ngagai semua serak komuniti kelebih agi raban nembiak.
“Pemisi teknologi pemadah enda ngira nengah media rama baka ‘Facebook’, ‘Whatsapp’ tauka radio enggau telipun iya nya pekara ti manah ke ulih nyungkak pemansang nyema dikena enggau manah.
“Taja pia, bisi sekeda orang enda berasai salah ngaga pengawa ti enda betul nengah pemansang teknologi tu. Entara nya naburka berita pelesu ti ulih ngeruga pengelikun sereta pengelantang orang bukai,” pia ku penyanyi Iban tebilang Linda Shimai lebuh ti meri jaku bekaul berita pelesu ti diterima madahka iya nyau nadai.
Nengah penerang nya, penyanyi Iban ti tebilang enggau lagu ‘Asai Ati Enggai Beserara’ sereta ‘ Dirantai Pengerindu’ nya dipadahka nyau nadai lalu bisi mega sida ti bepesan ngagai stesyen radio.
“Aku enda nemu nama batang tuju berita nya disadung, tang pekara tu ngenyima aku laban nengah pesan bansa tu ulih ngeruga pengelikun ruang bilik sereta ngenusahka ati bala peminat aku,” ku iya nandu.
Ku Linda, iya endang besetuju enggau atur baru ti terit sentang pekara nyadung berita pelesu tu digaga, laban tu ulih nagang sida ti bekenaka media rama ngambi ke berunding dulu sebedau bekunsika penerang ti diterima sida.
“Undang-undang baru ti digaga bekaul naburka penerang pelesu endang engkeman maya tu, laban nengah pemisi media rama, mayuh berita bisi digaga tang naka ni pengamai tetiap berita nya, nya ti nyadi pemerat tetiap penguna media rama,” ku iya nyemetak.
Linda ti udah bisi pansut enggau album tebaru iya ngambi awak tu mesan ngagai bala peminat iya di selampur nengeri ngambika enda pechaya ke berita selebubu ngapa ti disadung madahka iya nyau nadai, lalu iya mega enggau baruh ati minta ampun ngagai semua nyema berita tu ngirauka ati sida kelebih agi kaban belayan iya ti dampih.