Nengah pekara tu perintah patut bisi pelin nambah penyampau nembiak dalam pelajar STEM dikena napi pemar RP4
KUCHING: Perintah serius ba pengawa ngenegapka pelajar Sains, Teknologi, Kejuruteraan enggau Matematik ( STEM) di nengeri tu dikena napi pemar Revolusyen Pengawa Industri 4.0 (RP4).
Ba tuju pengawa tu, Menteri Pelajar, Sains enggau Pansik Teknologi, Dato Sri Michael Manyin Jawong madah patut bisi pelin pengawa nambahka penyampau nembiak ba pelajar STEM di renggat tumu.
Nitih ku iya, ngemai kelala tumu ba subjek Jaku Inggeris, Matematik, enggau Sains dikeandal ulih nerenak pengangkun nembiak nguasa bidang nya.
“Ba penemu aku dikena nguasa STEM, subjek ukai berengkah dipelajar maya ba sekula sekondari tang ari renggat tumu kelebih agi sekula primari lalu iya deka ngasuh sida bisi pengangkun ba pelajar STEM.
“Ari nya, sida deka ulih nguasa STEM enti deka napi pemar RP4,” ku iya lebuh bejadika Kolokium Pendidikan STEM 2018 Zon Sarawak di DeTAR PUTRA
Ba penemu aku dikena nguasa STEM, subjek ukai berengkah dipelajar maya ba sekula sekondari tang ari renggat tumu kelebih agi sekula primari lalu iya deka ngasuh sida bisi pengangkun ba pelajar STEM. Dato Sri Michael Manyin Jawong Menteri Pelajar, Sains enggau Pansik Teknologi
Universiti Malaysia Sarawak (UNIMAS), ditu, kemari.
Ngelansa silik, penetap tagit 60 peratus nembiak deka ngambi subjek sains enggau matematik ba aliran sains diperatika engkeman amat, seraya 40 peratus da agi deka dalam aliran sastera.
Taja pia, Sarawak naka diatu ngerikot 19 peratus nembiak Pom Tiga ti patut masuk aliran Sains ba Pom Empat.
“Enti pekara tu nyadi, baka ni kitai deka napi pemar RP4 laban RP4 minta mayuh agi orang gawa landik dalam bidang teknikal,” ku iya.
Berindik ari nya, ku Manyin, perintah ngulihka servis raban pinchin pengajar ba subjek Matematik, Sains enggau Jaku Inggeris ba pengawa mantu nambahka pengawa nguasa ba pelajar STEM di nengeri tu.
Pengawa tu ku iya deka dipun dalam taun tu berenggat di 10 ngagai 15 pelilih menua.
Ditanya pasal penyampau pengajar pinchi dipinta, ku Manyin, naka diatu penyampau bedau ditetap.
“Barang sapa ke bisi ati tau nganjung penerang ngagai Sekretari Mendam Opis Menteri Pelajar, Sains enggau Pansik Teknologi, Dr Abdul Rahman Deen.
“Bala sida deka nyadi pengajar ngagai bala pengajar ke bisi, lalu deka meri licha, ngajar subjek,” ku iya seraya madahka pengajar pinchin gawa nya deka dibayar belalauka penau dikembuan sida.
Kolokium Pendidikan STEM 2018 Zon Sarawak nyadi insiatif ngenegapka agi pelajar nya ti dipejalai enggau kerejasama UNIMAS, perintah nengeri sereta perintah besai.
Pengawa sehari na udah digulu lebih 1,000 iku ngaul bala prinsipal, kepala pen- gajar sereta bala pengajar STEM, pengari Serakup Apai Indai enggau Pengajar ( PIBG) sereta bala ketuai opis ari 200 buah sekula primari enggau sekondari di Sarawak.
Sama bisi datai, Sapit Direktor Ba Pengawa Pansik, Nyerenih enggau Merambu Pelajar Opis Menteri Pelajar Malaysia, Dr Latip Muhammad, Naib Canselor UNIMAS, Profesor Datuk Dr Mohamad Kadim Suaidi enggau Direktor Opis Pelajar Sarawak, Rakayah Madon.