Manifesto perintah BN dikearap mekuh ngagai sektor betanam betupi, IT
MIRI: Peranak Miri minta perintah nengeri numbuhka universiti Teknologi Pemadah (IT) di Sarawak, ngelangkar pemansang dagang nembiak sereta mayuh agi belanja diagih ungkup sektor betanam betupi dalam manisfesto Barisan Nasional (BN) Nengeri maya Pengawa Bepilih Besai Ke-14 (PRU14) tu.
Kaban veteran PBB, Hj Othman Ismail dekaka ari dua pekara tu, sektor betanam betupi diangkat enggau mayuh agi agih belanja sereta numbuhka universiti IT laban nya deka nyungkak transformasyen Sarawak.
“Mayuh agi belanja deka diagih ba sektor Betanam Betupi ngambika pejalai projek enggau program ulih dirumban seraya universiti IT deka mantu nempa mayuh agi raban landik digital antara rebak nembiak,” ku Hj Othman madah ngagai The Borneo Post kemari.
Nitih ku Hj Othman, manifesto BN Sarawak meseti setipak enggau peminta menua tu sereta nitihka peminta tetiap raban diselinting ari peranak di nengeri tu.
Ku iya, baka sektor betanam betupi, enti belanja enda diagih mayuh agi, pengawa deka lubah laban komuniti menua pesisir agi ditekul chara lama, nganti geran.
Ke bukai ku iya, sektor betanam betupi begunaka mayuh agi belanja ngambika semua program enggau teknologi pemadu baru ulih dibai ngagai sektor tu ke alai teknologi tu deka nambahka asil.
Ba pekara universiti IT, ku iya, kitai mansang ngagai revolusyen industri lalu tu siti ari kunchi pekara dikena ngenyampatka pemansang di nengeri tu enggau mayuh agi raban nembiak bepengelandik dalam IT dikena nangkup peminta deka datai.
Ku iya, manifesto BN meseti relevan ngambika rayat ulih beratika peminta enggau peneka rayat dikemerat.
Chairman UPP Pujut, Brune Chai madah, dekaka manifesto BN nengeri fokus ba pemansang dagang nembiak disengkaum.
Ku iya, rebak nembiak kita diatu ulih dipeda bisi pengeran gawa dikena idup lalu tebal agi sida keluar ar menua Sarawak laban bisi pematak dia.
“Tempa mayuh agi pengawa puang ungkup peranak Miti enggau pemanah MP ti ulih ngarika rayat lalu iya ti ulih nyediaka mayuh pengawa puang ungkup rebak nembiak di Miri ditu.
Ku iya, mayuh agi insentif ulih diberi ngagai pedagang nembiak laban kitai ditu ngembuan modal mensia lebih 10 taun dalam sektor minyak enggau gis lalu tu pekara ti deka dipeda peranak Miri dalam manifesto BN.
Ku iya, ari pekara tu deka nempa mayuh agi pengawa puang ungkup rebak nembiak.