Sida patut profesional lalu pechayaka Tuhan ti nentuka nasit sida sekalika nyadi chalun tauka enda maya bepilih tu

MIRI: Kepala Menteri Datuk Patinggi Abang Johari Tun Abang Openg ngelalau chalun ti bisi ati ngarika Barisan Nasional (BN) ngambika jenuh dulu ari ngelakuka diri lalu nejuka bala ketuai tetinggi BN mutuska chalun ungkup Pengawa Bepilih Besai Ke- 14 ( PRU14) ti deka datai.

Abang Johari ke mega Chairman BN Nengeri, madahka sida patut profesional lalu pechayaka Tuhan ti nentuka nasit sida sekalika nyadi chalun tauka enda maya bepilih tu.

“Anang belaya tauka charut deka nyadi chalun (ungkup PRU14). Enti tu peneka Tuhan, kita deka nyadi chalun lalu deka dipilih nyadi pengari,” ku iya lebuh bejadika Seminar Pemansang enggau Nyadi Ketuai Ungkup Ketuai Komuniti renggat nengeri di Hotel Pullman di Miri, kemari.

Antara bala bisi datai iya nya Sapit Kepala Menteri, Datuk Amar Douglas Uggah Embas enggau Datuk Amar Awang Tengah Ali Hasan, Datuk Patinggi Dr. George Chan exSapit Kepala Menteri, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Dato Sri Fatimah Abdullah, Menteri Dagang Antarabansa enggau E-Dagang, Dato Sri Wong Soon Koh enggau Menteri Pelajar, Sains enggau Pansik Teknologi, Dato Sri Michael Manyin.

PRU14 deka diatur enda lama agi laban timpuh lima taun BN megai perintah deka abis kena 24 Jun tu, lalu PRU14 meseti diatur dalam kandang 60 hari pengudah haribulan nya.

Abang Johari mega ngelalau bala ketuai komuniti, ke alai prinsip ke sama mega dipejalaika ba sida ke nyemetak madahka sida enda ibuh berebut ditikika pangkat nyadi Pemancha, Penghulu enggau Temenggong.

“Bala ketuai komuniti mega patut anang belaya ngambika diangkat nyadi Penghulu tauka Temenggong laban semua tu mega udah ditentuka Tuhan. Aku empu mega enda nemu aku ulih nyadi Kepala Menteri laban bisi Tok Nan (Datuk Patinggi Adenan Satem) lebuh nya. Tang Tuhan lebih sayauka iya, nya kebuah aku nyilih iya,” ku iya nambah.

“Pekara ti dikedekaka kitai iya nya peranak Sarawak nemu sereta ulih ngemansangka nengeri tu nyadi nengeri pemadu mansang di menua tu manggai ba taun 2030,” ku iya seraya nambah, Sarawak patut ngembuan ekonomi ti tegap lalu peranak seruran diau dalam pengelantang,” ku iya madah nyemetak.

Sepenyampau 1,452 iku ketuai komuniti adap Utara Sarawak mungkur Bagi Menua Bintulu, Miri enggau Limbang bisi ngulu seminar sehari nya ke diatur Opis Kepala Menteri bekerejasama enggau Angkatan Zaman Mansang.

Antara batang tuju iya nya nambahka pemereti pasal agenda pemansang ungkup nengeri enggau nambahka pemereti sida ba pengawa diri nyadi ketuai komuniti kelimpah ngiri pengelandik ngatur pengawa enggau nyadi ketuai ba renggat baruh.

Anang belaya tauka charut deka nyadi chalun (ungkup PRU14). Enti tu peneka Tuhan, kita deka nyadi chalun lalu deka dipilih nyadi pengari. Datuk Patinggi Abang Johari Tun Abang Openg Kepala Menteri